Раисҷумҳури худкомаи Тоҷикистон Эмомалӣ Раҳмон, ки беш аз 30 сол мешавад зимоми қудратро дар даст дорад, пас аз ду ҳафтаи ғайбат дубора дар расонаҳои давлатӣ пайдо шуд.
Расонаҳои ҳукуматӣ баъд аз ду ҳафтаи нопадидшавии Эмомалӣ Раҳмон пайдарпай ду навори ӯро аз мулоқот ва паёмаш нашр карданд, ки эҳтимол меравад бо ин кор мехоҳанд сару садоҳо дар бораи вазъи бади саломатии ӯро бартараф кунанд.
Аз ҷумла, сомонаи расмии Президент 14-уми феврал аз мулоқоти раисҷумҳур Раҳмонов бо президенти Бонки осиёии сармоягузориҳои инфрасохторӣ хонум Тсзоу Ҷиайи хабар дода, дар шабакаҳои иҷтимоӣ аз ин мулоқот аксу наворҳо нашр гардиданд.
Дар ин мулоқот ҷонибҳо густариши ҳамкорӣ дар соҳаҳои энергетика, инфрасохтори нақлиётӣ ва шаҳрӣ, идоракунии захираҳои об, мутобиқшавӣ ба тағйирёбии иқлим, рақамикунонӣ ва баланд бардоштани самаранокии энергетикиро баррасӣ карда, аз ҷалби маблағгузории дарозмуддат гуфтаанд.
Як рӯз баъди ин мулоқот, яъне 15-уми феврал сомонаи расмии Президент ва расонаҳои ҳукуматӣ паёми табрикӣ ва видеоии ӯ ба раҳбари Чинро нашр карданд. Дар ин паёми 3 дақиқаӣ Эмомалӣ Раҳмон бо табрики Си Ҷинпин, раисҷумҳури Чин ба муносибати оғози Соли нави чинӣ аз муносибатҳои дуҷонибаи ду кишвар изҳори хушҳолӣ мекунад.
Инчунин имрӯз 16-уми феврал сомонаи расмии Президент хабар дод, ки ӯ чанд қонун, аз ҷумла дар бораи “Хариди давлатӣ”-ро имзо карда, бо вазири корҳои хориҷии Қазоқистон Ермек Кошербоев, ки бо сафари расмӣ дар Душанбе қарор дорад, суҳбат кардааст.
Бояд гуфт, дар гузашта дафтари матбуоти Президент паёмҳои табрикии Эмомалӣ Раҳмон ба раҳбарони кишварҳои ҷаҳонро ба фарқ аз ин дафъа катбӣ нашр мекарданд.
Нашри мулоқоту паёми пайдарпайи Эмомалӣ Раҳмон дар расонаҳои давлатӣ дар ҳолест, ки ӯ тайи беш аз ду ҳафта – аз 28-уми январ то 13-уми феврали соли ҷорӣ, дар расонаҳо дида намешуд ва ин ҳам дар ҳоле буд, ки қаблан ӯ ҳатто барои ифтиҳоҳи мағозаву роҳҳои оддӣ ҳам дар расонаҳо намудор мегашт ва аз ӯ дар расонаҳои давлатӣ ба шиддат таърифу тамҷид мешуд. Ин ғайбати ӯ дар шабакаҳои тоҷикӣ бозтоби васеъ ёфта, ҳатто расонаҳои хориҷӣ ҳам онро пӯшиш доданд.
Ва нопадид шудани Эмомалӣ Раҳмон баҳсу гумонҳоро дар шабакаҳои иҷтимоӣ ба вуҷуд овард, ки раисҷумҳур ё бемор аст ва ё ҳодисае ба сараш омадаву мақомот онро эълон намекунанд.
Чунин ҳолатҳо қаблан ҳам сурат гирифта буд, ки Эмомалӣ Раҳмон чанд муддате аз расонаҳои давлатӣ ва маҷлисҳои ҳукуматӣ ғайб мезад. Борҳо дар бораи вафот ё беморияш овозаҳо нашр мегашт, аммо пас аз нашри овозаҳо, боз дар расонаҳо пайдо мешуд.
Вале ин бор, бахусус пас аз оне, ки мубаллиғони ҳукумат дар васфаш шеър гуфтанду аксҳои сиёҳу сафедашро нашр карданд ва мақомот ҳам насиҳатҳои васиятгунаи Эмомалӣ Раҳмонро нашр карданд, ки ӯ дар он наворҳо ба ҷавонону кӯдакон ва шаҳрвнадони кишвар хитоб намуда, аз худ ситоиш мекунад, ки умрашро барои ободии давлати Тоҷикистон бахшидааст, баҳсҳоро бештар кард.
Ҳамчунин дар ин миён аксе аз сомонаи “Flightradar” нашр гардид, ки дида мешуд ҳавопаймои президент рӯзи 28 ва 29-уми январ дар фазои Душанбе сабт шудааст, аммо дар бораи самти парвози он ва ҷойи фурудоӣ маълумот дастрас нест.
Радиои Озодӣ дар истинод ба манобеаш он замон навишта буд, ки “Эмомалӣ Раҳмон барои табобат ба ҷазираи Ҳайнани Чин рафтааст.”
Пас аз ҳадсу гумонҳо Барои бори аввал рӯзи 11-уми феврали соли ҷорӣ расонаҳои давлатии Тоҷикистон аз мулоқоту барномаҳои ояндаи Эмомалӣ Раҳмон маълумот нашр карда, навишта буданд, ки “Рӯзҳои наздик чанд мулоқоти Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва чорабиниҳои дигар дар назар аст.”
Аммо, торихи мулоқотҳо зикр нашуд. Танҳо гуфта мешуд, ки қарор аст дар рӯзҳои наздик раисҷумҳур бо президенти Бонки сармоягузориҳои инфрасохторӣ хонум Ҷоу Ҷиайи ва вазири корҳои хориҷии Ҷумҳурии Қазоқистон Ерлан Кошербаев дидор кунад.
Пас аз чанд соате худи ҳамон рӯз Дастгоҳи Президенти Тоҷикистон як матлаби дигаре нашр кард, ки дар он Эмомалӣ Раҳмон зери рақами №АП-971 ба Вазорати молияи Тоҷикистон фармон додааст, ки “аз ҳисоби маблағҳои фонди захиравии Президенти Ҷумҳурии Тоҷикистон дар соли 2026 ба Кумитаи кор бо ҷавонон ва варзиши назди Ҳукумати Ҷумҳурии Тоҷикистон барои мукофотонидани 67 ғолибон ва ҷоизадорони мусобиқаҳои байналмилалии варзишӣ ва мураббиёни онҳо ду миллиону чил ҳазор сомонӣ ҷудо намояд.”
Ин амри Президентро қариб тамоми ниҳодҳои ҳукуматӣ, ки дар Фейсбук саҳифа доранд, нашр карданд. Аз ҷумла, Паёми Душанбе, Ҷавонони Тоҷикистон, (ки ҳам дар сомонааш ва ҳам дар саҳфаи фейсбукияш нашр кард) Шуъбаи маорифи ноҳияи Фархор ва инчунин чандин ниҳоди дигар.
Ба назари коршиносон, матлабе, ки Дастгоҳи Президент дар бораи мулоқотҳо ва барномаҳои ояндаи Эмомалӣ Раҳмон хабар дод, дар асл як посухе буд ба мавҷи овозаҳо, ки ҳамаро пур карда буд ва мехостанд ба ин тариқ ба мардум бирасонанд, ки ӯ саломат асту барномаҳояш ҳам мисли қаблӣ идома доранд.
Пас аз зиёд шудани баҳсҳо дар атрофи куҷо шудани Эмомалӣ Раҳмон, ки ҳатто аз мубаллиғонашро нигарон карда буд, ҳавопаймои махсуси Эмомалӣ Раҳмон рӯзи 12-уми феврал ба Чин парвоз карда, рӯзи 13-уми феврал ба Тоҷикистон баргашт ва рӯзи баъд хабар аз мулоқоташ бо хонум Тсзоу Ҷиайи нашр гардид.
Бояд гуфт, Эмомалӣ Раҳмони 74-сола аз соли 1992 то 1994 раиси Шурои Олӣ ва аз соли 1994 то имрӯз раисҷумҳури Тоҷикистон буда, тамоми шохаҳои қудратро дар даст гирифта, аъзои хонавода ва наздикаш дар мақомҳои калидии ҳукумат кор мекунанд. Дар замони беш аз 30 соли ҳукуматдорӣ Раҳмон ва тимаш Тоҷикистонро ба як кишвари фасодзада табил дода, озодиҳои мардумро маҳдуд ва мухолифону дигарандешонро қатлу зиндонӣ мекунанд.
