Вазири дифои Тоҷикистон дар як суҳбати телефонӣ бо сарпарасти Вазорати дифои Эрон масоили вобаста ба вазъияти ахири минтақаро баррасӣ кард.
Дар ҷараёни ин суҳбат, ҷониби Эрон барои мавқеи сиёсӣ ва кумакҳои башардӯстонаи Душанбе изҳори сипос намудааст. Дар навбати худ вазири мудофеаи Тоҷикистон Эмомалӣ Собирзода бар аҳамияти сулҳу суботи воқеӣ барои кишварҳои минтақа, бахусус мардумони ҳамзабон ва дорои фарҳанги муштарак таъкид кард.
Ҳамзамон сарпарасти Вазорати дифои Эрон бо вазири дифои Покистон низ гуфтугӯи телефонӣ анҷом дод. Дар ин суҳбат зарурати тақвияти ҳамкорӣ барои таъмини сулҳ ва суботи минтақавӣ таъкид гардида, ҷониби Покистон ба мардуми Эрон ҳамдардӣ изҳор намуда, муқовимати онҳоро ситоиш кард.
Ёдовар мешавем, ки Тоҷикистон ҳамлаҳои Исроил ва ИМА ба Эронро маҳкум намуда, ҷонибдори ҳалли масъала тавассути роҳҳои дипломатӣ шуда буд. Инчунин Тоҷикистон дар оғози ин ҳамлаҳо ба Эрон кумакҳои башардӯстона ирсол намуд. Бар асоси маълумот, 110 мошини боркаш бо ҳаҷми умумии 3610 тонна маводи ниёзи аввал ба ин кишвар фиристода шудааст.
