Шаби 17-уми апрел дар марзи Тоҷикистон бо Афғонистон дар ҳудуди ноҳияи Фархори вилояти Хатлон даргирии мусаллаҳона сура гирифт, ки дар натиҷа ду нафар кушта шуданд.
Бино ба иттилои Нерӯҳои марзбонии Кумитаи давлатии амнияти миллии Тоҷикистон, афроди кушташуда қочоқбарони маводи мухаддир ва шаҳрвандони Афғонистон будаанд. Гуфта мешавад, ки онҳо ҳангоми кӯшиши убури ғайриқонунии марз “ба даъвати таслим шудан итоат накарда, муқовимати мусаллаҳона нишон додаанд.”
Гуфта мешавад, дар ҷараёни амалиёт як шаҳрванди дигари Афғонистон тавонистааст аз ҷойи ҳодиса фирор кунад. Ҳукумати Толибон то ҳол вобаста ба ин ҳодиса изҳороти расмӣ ироа накардааст.
Нерӯҳои мазбонии кишвар мегӯяд, аз ҷойи ҳодиса ду силоҳи навъи “Калашников”, ду тирдон бо 35 дона тир, як камони шикорӣ ва ду борхалта бо 25 бастаи маводи мухаддир дарёфт ва мусодира карда шудааст.
Ба гуфтаи мақомоти марбута, маводи мусодирашуда навъи “ҳашиш” буда, вазни умумии он тақрибан 25 килоро ташкил медиҳад.
Вобаста ба ин ҳодиса, мақомоти Тоҷикистон парвандаи ҷиноятӣ боз намуда, тафтишотро аз рӯи чанд банди Кодекси ҷиноятӣ, аз ҷумла “қочоқи маводи мухаддир” ва “гардиши ғайриқонунии силоҳ” оғоз кардаанд.
Қобили зикр аст, ки Тоҷикистон бо Афғонистон дарозтарин марзи муштаракро дорад. Дар ин марз ҳолатҳои убури ғайриқонунӣ, даргириҳои мусаллаҳона бо қочоқбарон ва гурӯҳҳои мусаллаҳ зиёд ба қайд гирифта мешавад.
Мақомот таъкид мекунанд, ки мубориза бо қочоқи маводи мухаддир дар марз бо Афғонистон идома дорад.
