Вазорати мудофиаи Тоҷикистон 24-уми май хабар дод, ки нақшаи даъвати шаҳрвандон ба хидмати ҳарбӣ пеш аз муҳлат пурра иҷро шудааст.
Ба иттилои вазорат, иҷрои саривақтӣ ва пеш аз муҳлати нақша натиҷаи афзоиши шумори ихтиёриён, пешниҳоди имтиёзҳои гуногун ба даъватшавандагон ва беҳтар шудани корҳои фаҳмондадиҳӣ дар байни аҳолӣ арзёбӣ мешавад.
Дар ҳамин ҳол, бархе таҳлилгарон бар ин назаранд, ки тағйирот ба қонуни уҳдадориҳои ҳарбӣ низ метавонад ба суръат гирифтани раванди даъват таъсир расонда бошад. Ба гуфтаи онҳо, қонуни нав ба мақомоти дахлдор имкон медиҳад, ки ҷавононро дар тӯли сол ба хидмати ҳарбӣ ҷалб намоянд.
Масъалаи ҷалби ҷавонон ба сафи артиш ҳамасола дар ҷомеаи Тоҷикистон мавриди баҳсу нигаронӣ қарор мегирад. Шароити қисмҳои ҳарбӣ, муносибати шадид бо сарбозон, ҳолатҳои бадрафторӣ, зарбу лат ва ҳатто ба марги оварда расондани сарбозон аз ҷумлаи нигарониҳое мебошанд, ки пайваста дар маркази таваҷҷуҳи ҷомеа қарор доранд.
Дар ҳамин замина, дар ду моҳи охир низ чанд ҳодисаи марги сарбозон расонаӣ шудааст, ки боиси вокуниш ва нигарониҳои ҷомеа гардида буд.
