Шуъбаи дуюми Вазорати корҳои дохилӣ (ШВКД-2) дар ноҳияи Фирдавсии пойтахт аз ошкор шудани як макони махсуси нашъамандон хабар дод.
Бино ба иттилои расмии ин ниҳод, Дилрабо Амироваи 38-сола бо ҳадафи ба даст овардани манфиати молиявӣ, хонаи истиқоматии ба иҷора гирифтаашро, ки дар кӯчаи Н. Қарабоев воқеъ аст, дар ихтиёри нашъамандон гузоштааст.
Дар хабари ВКД гуфта мешавад, ҳангоми гузаронидани чорабиниҳои оперативӣ-ҷустуҷӯӣ, кормандони милитсия соҳиби нашъахона ва чанд тани дигар, аз ҷумла Фирдавс Ниёзов, Сайдалӣ Одинаев ва ду ноболиғ — Хайринисо Каримова ва Сабрина Аҳмадиеваро ҳангоми истеъмоли маводи мухаддир бо далелҳои шайъӣ дастгир карданд. Зимни кофтуков аз боздоштшудагон маводи мухаддири навъи “метамфетамин” ва “ҳашиш”, инчунин таҷҳизоти махсуси истеъмоли он дарёфт ва мусодира шудааст.
Вазорати корҳои дохилӣ таъкид мекунад, ки нисбати соҳибмулки хона низ барои ба нашъамандон вогузор кардани манзил чораҳои қонунӣ андешида мешавад. Дар ҳоли ҳозир, вобаста ба ин ҳодиса маводҳои зарурӣ тартиб дода шуда, тафтишоти пешакӣ идома дорад. Мақомот то ҳол назари худи боздоштшудагон ё вакилони мудофиаи онҳоро расонаӣ накардаанд.
Коршиносон ва таҳлилгарон сабаби асосии афзоиши истифодаи маводи мухаддир ва машруботи спиртиро дар байни ҷавонони тоҷик ба мушкили бекорӣ, сатҳи пасти маърифат ва маҳдуд шудани дастрасии онҳо ба таълимоти дурусти динӣ дар масоҷид рабт медиҳанд.
