Муртазо, яке аз иштирокчиёни 16-солаи эътирозҳои ахир дар Ҳирот, ки зимни пароканда кардани тазоҳуркунандагон аз ҷониби Толибон захмӣ шуда буд, рӯзи сешанбе дар бемористон даргузашт.
Шабакаи хабарии “Афғонистон Интернешнл” бо истинод ба манобеи маҳаллии худ хабар медиҳад, ки Муртазо дувумин эътирозгарест, ки пас аз тирпарронии нерӯҳои Толибон ба сӯи тазоҳуркунандагон дар минтақаи Ҷабраили Ҳирот ҷон бохтааст.
Пештар Намояндагии Созмони Милали Муттаҳид дар Афғонистон тасдиқ карда буд, ки дар ҷараёни эътирозҳо дастикам як наврас бар асари тирпарронии Толибон кушта шуда, чанд нафари дигар дар натиҷаи латукӯб захмӣ шудаанд. Ин ниҳод гуфта буд, гузоришҳо дар бораи марги як нафари дигар низ вуҷуд дорад, ки ҳоло ҳақиқати ин иттилоъ мавриди санҷиш қарор дорад.
Ба гуфтаи манобеи маҳаллӣ, Толибон ҳамчунин ду нафарро бо иттиҳоми наворбардорӣ аз лаҳзаҳои даргирӣ ва тирпарронии нерӯҳои ин гурӯҳ ба сӯи эътирозгарон боздошт кардаанд.
Эътирозҳо дар Ҳирот пас аз он оғоз шуданд, ки мақомоти Толибон 8-уми июн даҳҳо зан ва духтарро ба иттиҳоми риоя накардани қоидаҳои либоспӯшӣ боздошт карданд. Эътирозгарон дар назди дафтари волии Толибон ҷамъ омада, шиорҳои “Марг бар диктатор” ва “Зан, зиндагӣ, озодӣ”-ро сар доданд ва аз ҳаққи кору таҳсили занон ҳимоят карданд.
Ҳамзамон шаҳрвандони Афғонистон ва фаъолони ҳуқуқи башар дар чанд кишвари ҷаҳон бо занони Ҳирот изҳори ҳамбастагӣ намуда, аз ҷомеаи байналмилалӣ хостаанд, ки дар баробари маҳдудиятҳои Толибон алайҳи занон иқдомҳои амалӣ анҷом диҳад.
Бар асоси гузоришҳои мунташиршуда, мақомоти расмии Толибон то ҳол вуқуи тирпарониро ба сӯи эътирозгарон ба таври комил рад накардаанд, аммо гуфтаанд, ки нерӯҳои амниятӣ барои “пароканда кардани таҷаммуи ғайриқонунӣ” ва “барқарор кардани назм” иқдом кардаанд. То кунун Толибон омори расмӣ аз кушта ё захмиҳоро мунташир накарда ва иддаоҳои марбут ба кушта шудани муътаризонро таъйид накардааст.
Ҳамчунин, Вазорати Амр ба маъруф ва наҳй аз мункари Толибон гузоришҳои марбут ба боздошти густурдаи занон ба далели риоят накардани ҳиҷобро рад карда ва гуфтааст, ки бархе гузоришҳо “бузургнамоии расонаӣ” аст.
