Сардори Хадамоти алоқаи назди Ҳукумати Тоҷикистон Исфандиёр Саъдуллоев мегӯяд, суръати миёнаи интернети мобилӣ дар кишвар нисбат ба аввали соли 2025 ба таври назаррас афзоиш ёфтааст.
Ба гуфтаи ӯ, агар дар аввали соли 2025 суръати миёнаи интернети мобилӣ 7,2 Мбит/с буд, ҳоло ин нишондиҳанда ба 35,4 Мбит/с расидааст. Ҳамчунин суръати интернети собит ба 48,71 Мбит/с баробар шуда, тибқи нақша, дар ду соли оянда то 100 Мбит/с расонида хоҳад шуд.
Саъдуллоев зимни нишасти хабарӣ ҳамчунин иттилоъ дод, ки дар давраи ҳисоботӣ хидматрасонии интернети моҳворавии Starlink расман дар Тоҷикистон ба фаъолият оғоз кардааст. Ба гуфтаи ӯ, ин иқдом метавонад дастрасии сокинони минтақаҳои дурдаст ва кӯҳистонро ба интернет беҳтар намуда, ба рушди инфрасохтори рақамии кишвар мусоидат кунад.
Мақомоти Хадамоти алоқа инчунин иттилоъ доданд, ки айни замон шумораи умумии муштариёни шабакаҳои алоқа дар Тоҷикистон ба 8,2 миллион нафар расидааст. Аз ин шумора 6,1 миллион нафар муштариёни фаъоли алоқаи мобилӣ мебошанд.
Тибқи омори расмӣ, шумораи истифодабарандагони интернети мобилӣ ва собит дар кишвар ҳоло 5,5 миллион нафар аст. Аз ин теъдод 5,3 миллион нафар аз интернети мобилӣ истифода мебаранд.
Айни ҳол дар Тоҷикистон хидматрасонии интернетро 6 ширкати алоқаи мобилӣ ва 30 ширкати алоқаи собит пешниҳод мекунанд.
Бо вуҷуди ин, новобаста аз каме беҳтар шудани суръати интернет, бисёре аз истифодабарандагон дар Тоҷикистон ҳанӯз аз сифати пасти он, махсусан интернети мобилӣ, изҳори нигаронӣ мекунанд. Коршиносон таъкид мекунанд, ки нишондиҳандаҳои омории пешниҳодшуда на ҳамеша таҷрибаи воқеии истифодабарандагонро, бахусус дар минтақаҳои дурдаст ва деҳот, пурра инъикос менамоянд.
