Шаби 22 июл нерӯҳои Украина бо истифода аз ҳавопаймоҳои бесарнишин (дронҳо) ба ду маркази логистикии ширкати бузурги савдои интернетии Wildberries дар шаҳрҳои Краснодар ва Невинномисск ҳамла карданд. Бар асари ин ҳамлаҳо дар ҳар ду анбор сӯхторҳои бузург ба амал омада, фаъолияти онҳо муваққатан қатъ гардид.
Ба иттилои мақомоти Русия ва роҳбарияти ширкат, дар натиҷаи ҳамлаҳо як нафар ҷон бохта, ҳадди ақал 15 нафар ҷароҳат бардоштанд. Аз ин шумора 10 нафар дар Краснодар ва панҷ нафар дар Невинномисск осеб дидаанд. Барои хомӯш кардани оташ даҳҳо воҳиди техника, беш аз 100 нафар оташнишон ва чархболҳои Вазорати ҳолатҳои фавқулода сафарбар шуданд.
Ҳамчунин хабар расид, ки дар ҳамлаи қаблии нерӯҳои укроини ба анборҳои Wildberries дар шаҳри Электростал, як тоҷик ҷони худро аз даст додааст. Аз ӯ Наврӯзҷон Содиқов ном бурда мешавад ва ба гуфтаи бародараш 25 сол дошат, он шаб дар анор навбатдор будааст.
Ин дувумин ҳамла ба марказҳои логистикии Wildberries дар давоми як ҳафта ба ҳисоб меравад. Пеш аз ин, анборҳои ширкат дар Электростал (наздики Маскав) ва вилояти Тамбов низ мавриди ҳамла қарор гирифта буданд. Бар асари он ҳамлаҳо ҳашт корманд ҷон бохта, фаъолияти чанд маркази логистикӣ халалдор шуд.
Раисҷумҳури Украина Володимир Зеленский изҳор доштааст, ки ин ҳамлаҳо ба иншооте равона шудаанд, ки ба гуфтаи Киев дар занҷираи таъминоти низомии Русия нақш доранд. Аммо Кремл ин иддаоро рад карда, таъкид мекунад, ки Wildberries як ширкати ғайринизомӣ буда, ҳадаф қарор гирифтани анборҳои он ба соҳибкорон, кормандон ва аҳолии осоишта зарари ҷиддӣ мерасонад.
Дар пайи ин ҳодиса, ширкати Wildberries фаъолияти ду маркази логистикии осебдидаро муваққатан боз дошт ва эълон кард, ки барои дастгирии фурӯшандагон ва интиқоли молҳо ба анборҳои дигар чора меандешад. Иттиҳодияи ширкатҳои савдои электронии Русия низ аз ҳукумат дархост кардааст, ки барои соҳибкорони зарардида имтиёзҳои андозӣ ва кумакҳои молиявӣ ҷудо кунад.
Ёдовар мешавем, ки чанде пеш ҳамлаи дигари Украина ба бозори бузурги «Садовод» дар вилояти Маскав низ боиси сӯхтор ва хисороти зиёди молӣ гардид. Бар асоси гузоришҳои расонаҳо, дар он ҳодиса чандин соҳибкори тоҷик низ аз сӯхтор ва аз байн рафтани молу маҳсулоти худ зарари ҷиддии молиявӣ дида буданд.
