Раиси Бонки миллии Тоҷикистон Фирдавс Толибзода мегӯяд, маблағҳои муштариён дар ҳамёни электронии «Душанбе Сити» гум намешаванд ва иддаоҳо дар бораи аз байн рафтани пул беасосанд.
Ӯ рӯзи 22 июл зимни нишасти матбуотӣ дар посух ба суоли хабарнигорон гуфт, ки дар баъзе ҳолатҳо ҳангоми интиқоли маблағ байни ҳисобҳо таъхир ба миён меояд, аммо маблағҳо гум намешаванд.
«Маблағ аз ин ҳисоб ба он ҳисоб меравад, каме вақт мегирад. Маблағҳо гум намешаванд, лекин баргардонидани маблағе, ки хато интиқол ёфтааст, каме вақт талаб мекунад», – гуфт Фирдавс Толибзода.
Ба гуфтаи раиси Бонки миллӣ, аз 890 арзу шикояте, ки вобаста ба хизматрасониҳои низоми бонкӣ ба ин ниҳод ворид шудааст, тақрибан 30 дарсад ба фаъолияти «Душанбе Сити» рост меояд.
Ба гуфтаи ӯ, ин маънои онро надорад, ки бонк ё мақоми танзимкунанда ба мушкилот расидагӣ намекунад. Толибзода гуфт, шикоятҳое, ки дар шабакаҳои иҷтимоӣ нашр мешаванд, аз ҷониби масъулони «Душанбе Сити» ва Бонки миллӣ мавриди баррасӣ қарор гирифта, барои ислоҳи камбудиҳо чораандешӣ мешавад.
Ин дар ҳолест, ки тайи чанд моҳи охир шумори зиёди истифодабарандагони «Душанбе Сити» дар шабакаҳои иҷтимоӣ ва расонаҳо аз сатҳи пасти хизматрасонӣ шикоят доранд. Ба гуфтаи бархе аз муштариён, ҳангоми анҷоми пардохтҳо маблағ аз ҳисоб кам мешавад, аммо амалиёт сари вақт анҷом намеёбад ва баргардонидани пул чанд рӯз ё ҳатто бештар вақт мегирад.
Ҳамчунин, баъзе аз муштариён аз мушкилоти техникӣ, қатъ шудани фаъолияти барнома, дастнорас будани хизматрасониҳо ва набудани маблағ дар банкоматҳо изҳори норозигӣ мекунанд. То кунун роҳбарияти «Душанбе Сити» ба ҳамаи ин шикоятҳо ба таври алоҳида вокуниши оммавӣ нишон надодааст.
Гӯфта мешавад, пардохти маош, нафақа, кумакҳои иҷтимоӣ ва бисёре аз хизматрасониҳои давлатӣ барои ҳазорон шаҳрванд тавассути низоми ин бонк анҷом дода мешавад. Аз ин рӯ, корбарон интизоранд, ки сифати хизматрасонӣ беҳтар гардида, мушкилоти мавҷуда ҳарчи зудтар бартараф карда шавад.
