Думаи вилояти Самараи Русия тағйиротеро қабул кардааст, ки аз соли 2027 афзоиши пардохтҳои муҳоҷирон ва пардохти иловагӣ барои фарзандони ҳамроҳашонро пешбинӣ мекунад.
Ба гузориши “Волга Ньюс”, вакилони маҷлиси қонунгузори вилоят рӯзи 10-уми ноябр ду лоиҳаи қонунро дар ду хониш қабул карданд. Санадҳо ба пардохтҳои андозии шаҳрвандони хориҷӣ ва ҳадди даромади зарурӣ барои зиндагии онҳо ва аъзои оилаашон дахл доранд.
Тибқи рақамҳое, ки ҳангоми баррасии лоиҳаҳо нашр шудаанд, пардохти моҳона барои муҳоҷироне, ки бо патент дар ширкатҳо ё назди соҳибкорони инфиродӣ кор мекунанд, 12 ҳазору 48 рубл пешбинӣ шудааст. Барои онҳое, ки назди шахсони воқеӣ ба корҳои шахсӣ ва хонагӣ машғуланд, ин маблағ 17 ҳазору 68 рубл хоҳад буд.
Барои ҳар фарзанди таҳти таъминоти муҳоҷир, ки ҳамроҳи ӯ дар Русия қарор дорад, пардохти иловагии моҳона низ пешбинӣ шудааст: барои гурӯҳи аввал 6 ҳазору 24 рубл ва барои гурӯҳи дуюм 8 ҳазору 534 рубл. Ин маблағҳо ба нисфи пардохти асосии ҳар гурӯҳ баробаранд.
Аз рӯи ҳамин рақамҳо, муҳоҷире, ки дар ширкат кор мекунад ва ду фарзандаш ҳамроҳаш ҳастанд, бояд моҳона дар маҷмуъ 24 ҳазору 96 рубл пардохт кунад. Барои муҳоҷири машғул ба корҳои хонагӣ бо ду фарзанд ин маблағ ба 34 ҳазору 136 рубл мерасад. Ин ҳисоб танҳо пардохтҳои зикршударо дар бар мегирад; ҳоло хароҷоти иҷора, ғизо, дармон ва дигар ниёзҳои моҳонаи оила ҷудо ҳастанд.
Тағйироти дигар ба даромади муҳоҷирон дахл дорад. Тибқи шарҳи нашршуда, барои соли 2027 ҳадди ақалли даромад барои худи муҳоҷир ва ҳар узви оилаи таҳти таъминоташ 29 ҳазору 932 рубл дар як моҳ, пеш аз пардохти андози собит, пешбинӣ шудааст. Дар сурати нокифоя будани даромад, эҳтимоли кӯтоҳ кардани муҳлати будубош, рад ё бекор кардани патент ва иҷозати иқомати муваққатӣ вуҷуд дорад.
Лоиҳаҳоро Вазорати меҳнат, шуғл ва сиёсати муҳоҷиратии вилояти Самара моҳи октябр пешниҳод карда буд. Рӯзи 9-уми ноябр кумитаи буҷети Дума онҳоро баррасӣ кард. Ба гузориши CityTraffic, маблағи пешбинишуда барои кормандони ширкатҳо нисбат ба соли 2026 ҳамагӣ 112 рубл бештар аст; аммо пардохтҳои иловагӣ барои фарзандон хароҷоти оилаҳои муҳоҷирро ба таври назаррас зиёд мекунанд.
Ин дар ҳолест, ки мақомоти Русия ҳар сол қарорҳое вобаста ба кор ва будубоши муҳоҷирон қабул мекунанд, ки аз як тараф корёбӣ ва аз тарафи дигар шароити буду бошро барои онҳо дар кишвар сахт кардааст.
