Ҷиҳати тармим ва беҳтарсозии шабакаи обу корези шаҳри Душанбе Бонки осиёии рушд 41 миллион доллар ҷудо кардааст. Дар ин бора «Радиои Озодӣ» дар сомонаи худ хабар додааст.
Гуфта мешавад шабакаи интиқоли 10 километрии обу корези Душанбе, ки соли 1970 сохта шудааст ва феълан корношоям мебошад. Нақши аслии он ҷамъоварии партов аз шабакаҳои обу корези хонагӣ дар шаҳр ва интиқоли онҳо ба марокизи тасфияхона буд, дар ҳоли ҳозир ин шабакаи интиқоли партов ба иллати фарсудагии таъсисот аз рада хориҷ шудааст. Ба иттилои бонк, дар қисмати болоии ин система дар атрофи Фурудгоҳи Байнулмиллалии Душанбе оби корез ба канал ворид шуда, барои саломатии сокинони ин маҳалла хатари ҷиддӣ эҷод мекунад.
Аз ҷумла, гуфта мешавад, ки беш аз 350 ҳазор сокини Душанбе бо чунин хатар рӯбарӯ будаанд., сухангӯи намояндагии Бонки Осиёии Рушд дар Тоҷикистон ба Радиои Озодӣ гуфтааст, дар чаҳорчӯби тарҳи имзошуда дар соли 2018, қарор аст, низоми корези пойтахти Тоҷикистон ба пуррагӣ бозсозӣ шавад.
Татяна Евстифеева, сухангӯи намояндагии Бонки Осиёии Рушд дар Тоҷикистон ба Рдиои Озодӣ гуфтааст: «Ин тарҳи 41-миллиондолларӣ аст ва барои бозсозии системаи корез беш аз нӯҳ миллион доллар сарф мешавад. Аз миёни чанд ширкати хориҷӣ ширкати олмонии “Ludwig Pfeiffer Hoch-und Tiefbau GmbH & Co.KG” интихоб шуд, ки дар гузашта дар бозсозии системаи обрасонии Душанбе таҷруба дорад. Сирояти бемории COVID-19 монеъ шуд, ки мутахассисони ширкат вориди Тоҷикистон шаванд. Бо беҳтар шудани вазъияти беҳдоштӣ онҳо ба кор шурӯъ мекунанд».
Дар баёнияи Бонки Осиёии Рушд гуфта шудааст, ки системаи корези 10-километрии ҷанубии шаҳри Душанбе солҳои 1970 бунёд шуда, феълан корношоям шудааст. Ба қавли ӯ, баъд аз бозсозӣ ин система метавонад боз 60 соли дигар фаъол бошад. Маҳмадсаид Зувайдзода, муовини аввали шаҳрдори Душанбе, дар шарҳи ин мавзӯъ гуфтааст, маблағи сармоягузории ин тарҳ грантӣ ё бебозгашт аст. Зувайдзода эътироф кардааст, ки феълан низ дар заминаи дастрасӣ ба оби ошомиданӣ дар бархе аз маҳаллаҳои Душанбе мушкилот вуҷуд дорад. Аз ҷумла, ба гуфтаи вай, ҳанӯз ба бархе аз сокинон об чанд соати маҳдуд дар шабонарӯз интиқол дода мешавад. Вай ҳамчунин хабар дод, ки қарор аст бо сармоягузории Бонки Ҷаҳонӣ маҳаллӣ гирдоварии оби корез аз маҳаллаи мавсум ба «Южний» ба минтақаи «Эсанбой» дар ғарби Душанбе кӯчонида шавад.
Аммо бархе аз соҳибназарон ба вуҷуди мавридҳои фасод дар иҷрои тарҳҳои бозсозии системаи обрасонӣ ва корез дар пойтахти Тоҷикистон ишора мекунанд. Зеро, ба гуфтаи онҳо, то ҳол ба ин манзур созмонҳои байналмилалии молӣ ҳудуди 200 миллион доллар ихтисос додаанд, аммо мушкили низоми обрасонӣ ва корез ҳамчунин бо мушкилоте рӯбарӯ аст. Дар ноябри 2018, Бонки Осиёии Рушд тарҳи беҳбуд ва беҳсозии шабакаҳо ва таъсисоти обрасониро барои таъмини оби нӯшокии беҳдоштии сокинони шаҳри Душанбе тасвиб кард. Ин аввалин тарҳи бахши шаҳрии Бонки Осиёии Рушд дар Тоҷикистон аст. Тоҷикистон аз соли 1998 узвияти Бонки Осиёии Рушдро ба даст оварда, то ҳол аз ин муассисаи молии байналмиллалӣ 1,8 миллиард доллар қарз, аз ҷумла 1,5 миллиард грант гирифтааст.
