Олмон ва Тоҷикистон ҷиҳати бунёди як неругоҳи барқи обӣ қарордод ба имзо расониданд. Дар ин бора хабаргузории “Sputnik” бо такя ба Дафтари матбуоти вазорати рушди иқтисод ва савдои Тоҷикистон иттилоъ дод.
Дар хабар омада, ки Завқӣ Завқизода вазири рушди иқтисод ва савдои Тоҷикистон ва мудири Бонки Рушди Олмон ҷиҳати бунёди неругоҳи барқи обии Себзор қарордоде ба арзиши 18 миллиону 600 ҳазор евро имзо карданд.
Лозим ба тазаккур аст, ки 2 августи соли 2019, Тоҷикистон ва Олмон тавофуқномаеро ба имзо расонданд, ки тибқи он Олмон барои сохти неругоҳи Себзор 17 миллион евро кумак хоҳад кард.
Ҳамчунин дар 2-уми декабри соли 2019, қарордоди молӣ барои сохти ҳамин неругоҳ байни давлатҳои Тоҷикистон ва Суис ба имзо расида буд.Бар пояи ин қарордод Суис барои бунёди хати интиқоли 110 килловватаи неругоҳи Себзор – Хоруғ, ба арзиши 9.55 миллион доллар ихтисос медиҳад.
Илова бар ин, Бонки Ҷаҳонӣ ҳам барои санҷиши зарфият ва тавонманди хати интиқоли барқи неругоҳ 1 миллиону 900 ҳазор доллар ба Тоҷикистон кумак кард.
Тоҷикистон қасд дорад сохтмони неругоҳи барқи обии Себзор зудтар ба анҷом бирасад ва дар нақша аст ки фаъолияти он дар соли 2022 ба роҳ монда шавад.Феълан сокинон ва корхонаҷоти Вилояти Худмухтори Бадахшонро ширкати “Помирэнержӣ” бо неруи барқ таъмин мекунад.Ин ширкат мустақил буда ва бо сармояи хориҷӣ фаъолияти худро пеш мебарад.ба фарқ аз бақия манотиқи Тоҷикистон ин вилоят танқиси дастрасӣ бо неруи барқро надорад.Вале баҳои истифодаи неруи барқ дар ин вилоят гаронтар аз дигар вилоятҳои Тоҷикистон аст.
