Имрӯз дар Маскав зимни нишасти Шӯрои вазирони корҳои хориҷии СҲШ бо президенти Русия Владимир Путин, вазирони хориҷаи Тоҷикистон ва Қирғизистон Сироҷиддин Муҳриддин ва Чингиз Айдарбеков бо ҳам мулоқо намуданд. Вазирони хориҷаи ду кишвари ҳамсоя таъкид бар ташкили мулоқот дар ояндаи наздик бораи аломатгузории марзи муштаракро баррасӣ карданд.
Бино ба иттилои хабаргузории “Sputnik” вазирони ду кишвар инчунин масъалаҳои марбут ба делимитатсия ва демаркатсияи сарҳади муштараки давлатиро баррасӣ карданд.
Гуфта мешавад, ки дар ин вохурӣ ҷонибҳо қайд карданд, ки бинобар паҳн шудани коронавирус, маҷбур шуданд музокироти гурӯҳҳои кории ҳайатҳои ҳукуматии Тоҷикистон ва Қирғизистонро ба таъхир андозанд. Масъулони баландпояи ин ду кишвар ҳарчи зудтар ташкил кардани музокирот дар масъалаҳои марзиро аҳаммиятнок хонда, инчунин масъалаҳои муҳим ва тавсеаи минбаъдаи муносибатҳои дуҷонибаро баррасӣ карданд.
Ёдовар мешавем, ки байни Тоҷикистон ва Қирғизистон 976 километр марзи муштарак вуҷуд дорад, ки аз ин шумор танҳо 504 километри он таъйин ва аломатгузорӣ шудааст. Боқӣ 472 километри дигари марзи давлатии миёни ду кишвар аломатгузорӣ нашуда номуайян боқӣ мондааст. Танишҳо байни сокинони минтақаҳои наздисарҳадии ин ду кишвар солҳост, ки идома дорад ва ин муноқишаҳо дар нуктаҳои номуайянии марзҳо сар мезанад, ки то ҳол даҳҳо захмӣ ва кушта аз ду ҷониб ба ҷо гузоштааст.
