Агентии омори назди Президенти Тоҷикистон миқдори маоши кормандони давлатиро нашр кард.
Гуфта мешавад, ки маоши аз ҳама пастаринро кормандони кишоварзӣ ва хоҷагии ҷангал мегиранд, ки 563 сомонӣ (49 доллар)-ро ташкил медиҳад. Дар ин бора сомонаи “Sputnik” аз манбааш аз Агентии омор иттилоъ медиҳад.
Ҳамчунин гуфта шудааст, ки маоши баландтарин аз кормандони молия (бонк) ва суғурта буда, ки ҳудуди 3 ҳазору 397 сомонӣ(300 доллар)-ро дар бар мегирад.
Маоши кормандони истихроҷи металҳои қимматбаҳо ва сохтмон 2,400 сомонӣ буда, бахши барқу об 2,300 сомониро ташкил медиҳад.
Агентии омор гуфтааст, маоши миёна дар моҳи сентябри соли 2020 дар ҷумҳурӣ 1 ҳазору 426 сомониро ташкил додааст.
Маврид ба ёдоварист, ки дар Тоҷикистон маоши ҳадди ақал 400 сомонӣ (35 доллар) гуфта мешавад.
Чанде пеш хабаргузориҳо дар мавриди музди меҳнат дар кишварҳои Осиёи Марказиро нашр карда буданд, ки Тоҷикистон дар байни онҳо дар зинаи аз ҳама поёнтарин қарор гирифт.
Коршиносони умур яке аз сабабҳои ривоҷ ёфтани корупсияро дар кишвар вобаста ба маоши пасти кормандон унвон мекунанд. Аз баски маошашон ба зиндагӣ нокифоят аст, даст ба фасод мезананд.
То дар мавриди маоши Президенти кишвар ва сарвазиру дигар мақомҳои баландпоя чизе гуфта намешавад. Сиррест пинҳон. Аммо огаҳони умур мегӯянд, маоши кормандони суду прократура ва сохторҳои қудратӣ ба он андозае, ки гуфта мешавад, бовар нокарданист. Чун хонаҳои бо ҳашамату мошинҳои гаронбаҳои онҳоро ҳечгоҳ бо пули маош харидан имкон надорад.
