Дар Бритониёи Кабир навъи нави вируси корона кашф шудааст, ки эҳтимолан суръати паҳншавии он бештар аз суръати вируси шинохташудаи феълӣ мебошад.
Дар пайи интишори ин навъи коронавирус дар Бритониё ҳукумат дар рӯзҳои ҷашни соли нави мелодӣ маҳдудиятҳои шадидтар ҷорӣ кард, ки ин қарор ба ҳаёти беш аз 20 миллион нафар дар Бритониё ва Уэлс таъсир мерасонад.
Вазири тандурустии Бритониё Мэттю Хэнкок рӯзи душанбе 14 декабр гуфт, ҳеҷ далеле вуҷуд надорад, ки вируси тозакашфшуда нисбат ба навъҳои қаблӣ хатарноктар бошад ва ё ваксинаи корона ба он таъсир нарасонад. Хэнкок бо ишора ба ин ки ҳафтаи гузашта дар Лондон ва баъзе шаҳрҳои дигари Бритониё афзоиши бо суръати гирифторони ин вирус мушоҳида шудааст, гуфт:
“Мо ҳазор ҳолати ин намуди нави коронаро ба қайд гирифтем, ки аксарияти онҳо дар ҷануб будаанд, аммо дасти кам шаст маркази саломатии минтақавии дигар низ ин намуди вируси навро ба сабт карданд.”
Вазири тандурустии Бритониё бо ёдоварӣ аз он, ки ҳаҷми дақиқи ин масъала ҳанӯз мушаххас нашудааст, мегуяд, ки ҳукумати ӯ дар ин бора ба Созмони ҷаҳонии тандурустӣ хабар додааст ва Маркази Портон Даун дар ин замина таҳқиқоти муфассалро низ оғоз кардааст.
Хабари кашфи навъи нави коронавирус дар ин кишвар дар ҳоле эълом мешавад, ки тазриқи ваксинаи COVID-19 дар ин кишвар оғоз шудааст. Гузоришҳо дар бораи интишори коронавирус дар Бритониё ва баъзе дигар кишварҳо, аз ҷумла Испания, Нидерланд ва Дания мавҷуданд. Аммо зоҳиран фарқи байни намудҳои нави ба қайд гирифташуда дар Бритониё ва дигар намудҳои вирус суръати баланди интиқоли он мебошад.
