Вазорати тандурустӣ ва ҳифзи иҷтимои аҳолии Ҷумҳури Тоҷикистон хариди ваксинаи навъи “Спутник V”-и истеҳсоли Русияро рад кардааст.
Ин дар ҳолест, ки чанде пеш сафири Русия дар Тоҷикистон Игор Лякин-Фролов ба хабаргузории русии “РИА Новости” гуфта буд, ки Тоҷикистон барои воридоти воксинаи навъи “Спутник V”-и истеҳсоли Русия бо мақомоти кишвараш вориди гуфтугӯ шудааст.
Бино ба иттилои сомонаи “Азияи-Плюс” аз маркази матуботи Вазорати тандурустӣ хабарро беасос гуфтаанд. Аммо гуфтаанд, баъди тасдиқ гардидани озмоиши охирини воксин масъалаи дастрас намудани он мавриди гуфтугӯ қарор хоҳад гирифт.
Ҳамчунин зикр гардидааст, ки ҳанӯз мушаххас нест, ки ин ниҳод аз кадом кишвар воксинаи зидди коронавирусро мехарад.
Аз дафтари матбуоти Вазорати тандурустӣ ба “Азия-Плюс” гуфтаанд:
“Тавре шумо медонед, воксинаи Русия аз ду марҳилаҳои озмоишҳои клиникӣ нагузаштааст. Вақте ки охирон марҳилаҳоро мегузаранд ва самаранокии воксина исбот мешавад, мо гуфтушунидҳоро барои харидории он оғоз мекунем. Дар ҳоли ҳозир, ин масъала баррасӣ намешавад”.
Дар ҳамин ҳол низ Вазорати корҳои хориҷии Тоҷикистон иброз дошта, ки дар масъалаи воридоти воксина бо Вазорати тандурустӣ ҳамкорӣ мекунанд ва шарту шароити ворид кардани онро ин ниҳод хубтар медонад.
Ҷамолиддин Абдуллозода Вазири тандурустии Тоҷикистон чанде пеш гуфта буд, ки Тоҷикистон дар доираи як механизми Иттиҳоди ҷаҳонии воксин ва масунсозӣ (GAVI) бо номи “COVAX” ҳамкориро оғоз карда, ки қарор аст дар доираи ин 1,8 миллион ё 20 дарсади аҳолии Тоҷикистон бо воксинаи ройгон таъмин шаванд, вале аз куҷо дарёфт кардани онро нагуфтааст.
Гуфта мешавад, аз ҷониби Бонки умумиҷаҳонӣ 3 миллион доллар барои харидории ваксинаи зидди кароавирус ҷудо гардида, иловатан ҷудо намудани 5 миллион доллари амрикоӣ дар назар дошта шудааст”, гуфтаанд, дар Вазорати тандурустӣ.
Бино ба навиштаи расонаҳо вазири тандурстӣ гуфтааст, дар доираи ташаббуси “COVAX” пеш аз ҳама “кормандони соҳаи тиб, маориф, аҳолии аз 50- сола боло ва шахсони гирифтори бемориҳои музмини ғайрисироятӣ воксин зада мешаванд”.
