Пас аз дигарбора ҷорӣ шудани лимити барқ дар деҳоти Тоҷикистон якбора нархи ангишт боло рафтааст.
Ба “Аздо тв” чанд нафар аз сокинони ноҳияи Панҷ, Шаҳритӯс ва Қубодиён хабар доданд, ки пас аз ҷорӣ гардидани лимит дар деҳот нархи ангишт гарон шуд. Ба қавли манобеи мо фурӯшандагон сабабҳои боло рафтани нархи ангиштро дар гарон шудани он дар конҳо рабт медиҳанд.
Як сокини ноҳияи Панҷ ба шарти бурда нашудани номаш ба “Аздо тв” гуфт, пеш аз лимит як кило ангиштро бо нархи 1.8 – 2 сомонӣ харидорӣ мекардем, пас аз лимит ҷорӣ шудан як кг ангишт аз 2.5 то 2.8 сомонӣ гарон шудааст.
“Вақте ба фурӯшандагон муроҷиат мекунем, ки чаро нарх гарон шуд? Онҳо мегӯянд, дар конҳо нархи ангиштро боло бурданд”, – мегӯяд манбаъ.
Ба гуфтаи ин ҳамсӯҳбати мо, мардум дигар маҷбуранд барои гарм кардани хонаҳояшон гарон ҳам бошад, бихаранд, зеро зимистон имсол сард омадааст ва дигар чорае надоранд.
Ба гуфтаи баъзе манобеъ, конҳои ангишт дар Тоҷикистон тобеъи ширкати “Фароз”, ки моликаш Шамсуллоҳ Соҳибов ва ширкати “Талко Ресурс” мутааллиқ ба Ҳасан Асадуллозода ва низдикони дигари Эмомалӣ Раҳмон қарор доранд, ки бе иҷозаи онҳо дар Тоҷикистон касе ҳаққи коркарди ангиштро надорад.
Ширкати “Барқи тоҷик” расман аз 5 январи соли равон эълон кард, ки интиқоли барқ аз соати 23 то 6-и субҳ дар деҳаҳо қатъ мешавад.
