Дар Тоҷикистон шуруъ аз имрӯз 1 феврал дари масҷидҳо барои намозгузорон баъд аз таътили 10 моҳа дигарбора боз шуданд. Аммо риояи фосилаи иҷтимоӣ ва зиддиуфунӣ кардани дастҳову доштани ниқоби тиббӣ шарти асосӣ барои ворид шудан ба масҷидҳост.
Ҳангоми аввалин намоз имрӯз муфтии Тоҷикистон Саидмукаррам Абдулқодирзода аз намозгузорон хоста, ки ҳар нафаре, ки ба масҷид меояд бояд бо худ ҷойнамоз дошта бошад ва масофаро риоят кунад.
Пеш аз қарори кушодани масҷидҳо Ситоди ҷумҳуриявӣ оид ба пешгирӣ аз паҳншавии бемории COVID-19 ҳушдор дода буд, ки дар сурати риоят нагардидани қоидаҳои беҳдоштӣ метавонад дари масҷидҳоро дигарбора бандад.
Афшини Муқим, сухангӯи Кумитаи дин рӯзи 1-уми феврал ба Радиои Озодӣ гуфт:
“Ҳар ҷойи ҷамъиятӣ, ки шароити беҳдоштӣ, шахсию ҷамъиятӣ дар он риоят намешавад, аз ҷониби мақомоти ваколатдори давлатӣ чора андешида мешавад. Дар нисбати масҷидҳо ин чиз истисно буда наметавонад. Ҳар масҷиде, ки қоидаҳои беҳдоштиро сарфи назар мекунад ва эҳтимоли гирифтории сокинонро ба бемории сироятӣ ба вуҷуд меорад, фаъолияти он то рафъ кардани мушкилот баста мешавад.”
Чанде пеш дар шабакаҳои иҷтимоӣ хабарҳо дар бораи талаби бозкушоии масҷидҳо аз ҷониби сокинон садо медод. Дар пайи ин Кумитаи дин, анъана ва ҷашну маросимҳои Тоҷикистон гуфт, ки ба Ситоди ҷумҳуриявӣ оид ба мубориза ва пешгирӣ аз коронавирус барои кушодани масҷидҳо дархост додаанд ва мунтазири посуханд.
