Русия аз ҷониби Тоҷикистон хостааст то 20 ҳазор шаҳрвандонашро ҳамчун муҳоҷири корӣ ба ин кишвар бифиристад. 1.5 ҳазор нафар аз ин муҳоҷиронро ҳукумати Маскав интизор аст.
Одатан ҳукумати Маскав муҳоҷирони тоҷикро дар корҳои рубу чин ва барфтозакунӣ кор мефармояд. “РИА Новости” аз қавли муовини муовини вазири меҳнат, муҳоҷират ва шуғли аҳолии Тоҷикистон Шаҳноза Нодирӣ навишта, ки “То имрӯз мо аз Русия дархости интиқоли 20 ҳазор муҳоҷирро тариқи истихдоми созмонӣ пайдо кардем”.
Аз ин шумори муҳоҷирон 10 ҳазори онҳо барои вилояти Краснодарск лозим буда ва дар соҳаи сохтмон бо кор таъмин карда мешаванд.
Дар ҳамин ҳол муовини вазири меҳнат, муҳоҷират ва шуғли аҳолии Тоҷикистон мегӯяд, ки дархост аз Русия ба қувваи корӣ гуногун аст: “аз коргар дар соҳаи сохтмон то бофандагону мутахассисони технологияи хӯрокворӣ”.
Нодирӣ ҳамчунин қайд кардааст, ки дархост барои коргар аз худи корфармоён ба Вазорат ва Агентии кор дар хориҷа ворид мегарданд.
“Асосан кордиҳандагоне муроҷиат мекунанд, ки бо муҳоҷирони мо то замони пандемия кор мекарданд”.
Торнамои “Спутник” ношири ин хабар навишта, ки дар охирҳои моҳи январ нахустин гӯруҳи 171 нафарии муҳоҷирон аз Тоҷикистон ба Русия сафар карданд. Ҳамаи онҳоро пас аз гузаштан аз карантин дар сохтмонҳои Иркутск ба кор таъмин мешаванд.
Димитрий Песков сухангӯи Кремлин пештар изҳор дошта буд, ки ҳукумати кишвараш имконияти кушодани марзҳоро барои муҳоҷирони корӣ баррасӣ дорад.
Бар паи бастани марзҳо бар асари пандемияи ба вуҷудомада адади муҳоҷирон дар Русия ба наздики ду маротиба кам шуда аст, ки ҳоло ҳукумати ин кишвар аз норасоии коргарон дар соҳаҳое, ки худи русягиҳо камтар кор кардан мехоҳанд шикоят дорад.
Дар соли 2019, 19,5 миллион хориҷиён ва шахсони бешаҳрвандӣ дар қайди ниҳодҳои муҳоҷират сабт шуда буданд. Аммо Соли гузашта, мувофиқи маълумоти ВКД Русия ҳамагӣ 9,8 млн муҳоҷир сабт шуда аст.
Коҳиши ададро ба пандемия ва баста будани марзҳо рабт медиҳанд. Песков мегӯяд ҷалби қувваи корӣ на танҳо дар соҳаи кишоварзӣ балки, барои соҳаи сохтмон низ аҳамият дорад.
