Иҷлосияи навбатии Шӯрои амнияти дастаҷамъии Созмони Аҳдномаи Амнияти Дастаҷамъӣ (СААД) дар семоҳаи чоруми соли равон дар Тоҷикистон баргузор мегардад. Дар ин бора рӯзи чоршанбе Хадамоти матбуотии Вазорати корҳои хориҷии Ҷумҳурии Қазоқистон пас аз мулоқоти сардори ин шӯъба Мухтор Тлеубердӣ бо дабири кулли СААД Станислав Зас хабар дод.
“Дар ҷараёни ин мулоқот, онҳо дар бораи фаъолияти ҷории СААД мубодилаи афкор намуда, доираи васеи масъалаҳоро дар тамоми самтҳои асосии фаъолияти созмон баррасӣ карданд. Вазир талаби баргузор шудани ҷаласаи навбатии Шӯрои вазирони корҳои хориҷии СААД дар Душанберо, ки қарор аст моҳи майи соли ҷорӣ дар Тоҷикистон баргузор гардад, пазируфт”, – омадааст дар хабар.
Тибқи иттилои Вазорати корҳои хориҷии Қазоқистон, ҷонибҳо хамчунин омодагии худро ба ҳамкорӣ барои таҳкими минбаъдаи созмон изҳор доштанд.
Дабири кулли СААД рӯзҳои 9-10 март бо сафари корӣ дар Қазоқистон қарор дорад. Интизор меравад, ки Станислав Засро Президенти ин кишвар Касым-Жомарт Токаев ба ҳузур пазирад.
Созмони Паймони Амнияти Дастаҷамъӣ соли 2002 таъсис ёфта, як созмони байналмилалии минтақавӣ мебошад, ки кишварҳои Қазоқистон Русия, Арманистон, Беларус, Қирғизистон ва Тоҷикистон шомили онанд. Дар ҳоли ҳозир раёсати ин созмонро Тоҷикистон бар ӯҳда дорад.
