Дар Қирғизистон пас аз задухӯрдҳо дар марз нисбати шаҳрвандони Тоҷикистоне, ки дар он муноқиша иштирок карданд, 11 парвандаи ҷиноӣ боз кардаанд. Дар ин бора ба “Интерфакс”, Вазорати умури дохилаи Қирғизистон хабар дод.
Кормандони мақомоти ҳифзи ҳуқуқ ин кишвар якбора ба таҳқиқи чанд парвандаи куштор шурӯъ карданд. Яке аз ин парвандаҳо пас аз марги духтари 12-сола шурӯъ шудааст.
Як парвандаи дигар бо далели қатли ом дар нуқтаи тақсимоти оби “Головной”, ки дар он ҷо ҷасади ҳадди ақал 25 нафар ёфт шуд, кушода шудааст.
Инчунин парванда барои тирандозии мошинҳои ғайринизомиён дар роҳ, боз шудааст. Ғайр аз ин, дар Қирғизистон парвандаҳо тибқи моддаҳои “Бетартибии оммавӣ”, “Ҷиноятҳо алайҳи сулҳ”, “Авбошӣ”, “Нобуд ё вайрон кардани моликияти дигарон” ва “Убури ғайриқонунии марз” таҳқиқ карда мешаванд.
Пештар хабар дода шуд, ки Қирғизистон ва Тоҷикистон ба хуруҷи нерӯҳо ва таҷҳизот аз минтақаи даргириҳои мусаллаҳ дар марз шурӯъ карда, вазъ дар марз ба эътидол омадааст.
Задухӯрдҳо дар қитъаи баҳсии марзи Тоҷикистону Қирғизистон дар минтақаи нуқтаи тақсимоти оби “Головной” баъд аз зӯҳри 29 апрел оғоз ёфтанд. Ҷонибҳо якдигарро ба иғво айбдор карданд.
Тибқи маълумоти охирин, дар Қирғизистон 34 нафар кушта ва 178 нафар маҷрӯҳ шуданд. Тоҷикистон то ҳол маълумоти расмӣ дар бораи қурбониёнро пешниҳод накардааст. Бино ба гузориши расонаҳо, дар ин даргириҳо даҳҳо тоҷик низ кушта ва беш аз 90 нафар маҷрӯҳ шудаанд.
