Шоми дирӯз, 7-уми июл, дар даври дуввуми бозиҳои ниманиҳоии Евро-2020 Дания аз Англия шикаст хурд. Англия бори аввал дар таърихи худ ба финали Чемпионати Аврупо оид ба футбол баромад.
Дар дақиқаи 30-юм даниягӣ Миккел Дамсгор бо зарбаи ҷаримавӣ ҳисобро боз кард. Дар дақиқаи 39-ум Симон Кйер ба дарвозаи худ гол зад ва ҳисобро баробар намуд. Ин 11-ум “автогол” дар ин мусобиқа мебошад.
Дар нимаи дуввуми бозӣ низ ҳисоб тағйир наёфта, вақти изофӣ таъин шуд.
Дар дақиқаи 104-ум довари бозӣ пеналти таъйин намуд, ки норозигии корбаронро дар шабакаҳои иҷтимоӣ ба бор овардааст. Ба назари корбарон довари бозӣ хато ҷаримаи 11-метра таъйин намудааст.
Дар аввал бозигари Англия Ҳарри Кейн натавонист пеналтиро ба ҳадаф расонад – Каспер Шмейхел зарбаи ӯро гардонд, аммо баъдан ҳамлагар тӯбро ба дарвоза даровард.
Кейн бо ин голаш рекорди Гари Линекерро аз рӯи шумораи голҳо дар Англия такрор намуд (10).
Бозии ниманиҳоии Евро-2020 Англия – Дания дар Лондон дар варзишгоҳи “Уэмбли” баргузор шуд.
Дар финал Англия бо тими миллии Италия бозӣ мекунанд. Бозӣ дар ҳамон варзишгоҳ 11 июл баргузор мегардад.
Гуфтанист, 6-уми июл, дар аввалин даври бозиҳои ниманиҳоии Евро-2020 дар Лондон Италия Испанияро шикаст дод.
