12-июл Вазорати корҳои дохилии Русия гуфт, муҳоҷироне, ки нисбаташон қарори “будубоши номатлуб” қабул шудааст, вуруди онҳо манъ ва тамоми ҳуҷатҳое, ки пеш аз он ба ишон дода шудааст, ба таври худкор бекор карда мешаванд.
Хабаргузории ТАСС дар истинод ба Маркази матбуотии ВКД Русия хабар дод, “Ин тасмим нисбати шахсоне қабул карда мешавад, ки ба амнияти давлат, ба қобилияти мудофиавӣ, тартиботи ҷамъиятӣ ё ба саломатии аҳолӣ таҳдиди ҷиддӣ доранд.”
Инчунин гуфта мешавад, нисбати шаҳрвандони хориҷие, ки қонунҳои Русияро вайрон кардаанд ва будубош ё истиқоматашон дар Русия номатлуб эълон шудааст, чораҳои гуногуни маъмурӣ ҷорӣ шуда, аз ҷумла вазифадор мешаванд кишварро тарк кунанд. Дар акси ҳол онҳоро ихроҷ (депортатсия) хоҳанд кард.
Ҳамзамон дар иттилоъия омада, ки Вазорати корҳои дохилӣ, ФСБ, Вазорати мудофиа, Росфинмониторинг, Хадамоти иктишофии хориҷии Русия (СВР), Вазорати корҳои хориҷӣ (ВКХ), Хадамоти федералии ҷазо (ФСИН), Роспотребнадзор ва Агентии федералии тиббӣ ва биологӣ (ФМБА) метавонанд нисбати “муҳоҷирони номатлуб” чунин тасмим бигиранд.
Тибқи иттилои вазорат, дар тӯли панҷ моҳи соли равон чунин қарор нисбати 19 нафар қабул шудааст, ки нисбат ба ҳамин давраи соли 2020 тақрибан 20% камтар аст.
11-уми июл Вазорати корҳои дохилӣ мораторияи номатлуб эътироф кардани будубоши муҳоҷирон ба қаламрави Русияро то 30 сентябр тамдид кард.
Ин ҳам дар ҳолест, ки рӯзи 9-уми июли соли ҷорӣ Вазорати корҳои дохилии Русия лоиҳаи қонунро дар бораи қоидаҳои нави вуруд ва будубоши хориҷиён ба кишвар омода кард. Дар лоиҳа тағйиру иловаҳо, аз ҷумла, тавсия дода шуд, ки иҷозати иқомати муваққатӣ (РВП) дар Русия бекор карда шавад.
Худи ҳамон рӯз иттилоъ дода шуд, ки барои вуруд ё будубоши дарозмуддат дар Русия шаҳрвандони хориҷӣ як ҳуҷҷати ягона бо маълумоти электронӣ мегиранд.
