Озарбойҷон ҳамчун кӯмаки башардӯстона ба Тоҷикистон ваксинаҳои “AstraZeneca” барои COVID-19-ро тақдим кард.
Тибқи маълумоти Вазорати тандурустӣ ва ҳифзи иҷтимоии аҳолии Тоҷикистон, аз Озарбойҷон ба Душанбе тавассути ҳавопаймо 40 ҳазор воя (доза) ваксинаи AstraZeneca оварда шудааст.
Дар маросими супоридани ваксинаҳо дар фурӯдгоҳи Душанбе, намояндагони Сафорати Озарбойҷон дар Тоҷикистон ва Вазорати тандурустии Ҷумҳурии Тоҷикистон ширкат варзиданд.
Гуфта мешавад, ки ин ваксинаҳо дар анбори махсуси Вазорати тандурустӣ нигоҳ дошта мешавад ва дар раванди эмкунии аҳолӣ истифода мегарданд.
Ёдовар мешавем, ки дар оғози моҳи марти соли ҷорӣ дар доираи механизми COVAX ба Тоҷикистон 192 ҳазор воя ваксинаи AstraZeneca оварда шуд.
Дар охири моҳи июн 300 ҳазор воя ваксинаи чинии CoronaVac аз Чин ба Душанбе ройгон оварда шуд. Тоҷикистон ният дорад, ки аз ҳисоби гранте, ки Бонки Осиёии Рушд ҷудо кардааст, аз Чин 3 миллион дозаи ин навъи ваксинаро харидорӣ кунад.
