Дар Маскав сад нафар аз иштирокчиёни маросими ёдбуди қурбониёни “Хоруғ-2012”- ро Боздошт карданд.
24-июн дар тарабахонаи минтақаи метрои Черкизовскии Маскав, ки дар онҷо маросими ёдбуди қурбониёни ҳодисаҳои “Хоруғ-2012″ баргузор мешуд, мақомоти Русия беш аз 100 нафар иштирокчиёни маросимро боздошт карданд. Дар ин бора “Pamir Daily News” хабар медиҳад.
Ба қавли яке аз иштирокчиёни маросим, чорабинӣ соати ҳашти шом ба вақти Маскав оғоз ёфт. Аммо пас аз як соат полис омада ба чорабинӣ халал расонда ҳамаи иштирокчиёнро боздошт кард. Сабаби боздошт маълум нест, омадааст дар хабар.
Қаблан фаъолони ҷавони Бадахшон дар Маскав эълом доштанд, ки рӯзи 24-уми июл барои ёдбуди қурбониёни рӯйдодҳои “Хоруғ-2012” чорабинӣ баргузор хоҳанд кард.
Гуфта мешавад, аз тарафи намояндагони диаспораи Бадахшон дар Русия ҳар сол якчунин масросим баргузор мешавад. Чорабинӣ аз қироати Қуръон ва сурудҳои мазҳабӣ иборат аст, ки хосси суннатҳои мардуми ВМКБ мебошанд. Ин иқдом ҳамасола дар Хоруғ низ баргузор мешавад.
Воқеаҳои хунини Хоруғ баъд аз қатли Абдулло Назаров, генерали Кумитаи давлатии амнияти миллӣ дар шаҳри Хоруғ моҳи июли соли 2012 сурат гирифт.
Он замон мақомоти кишвар хостори боздошти чаҳор фармондеҳи собиқ шуданд ва ниҳодҳои интизомии Тоҷикистон як амалиёти вижаи низомиеро дар Хоруғ роҳандозӣ намуданд. Дар ин даргириҳо даҳҳо нафар кушта ва захмӣ шуданд, ва дар натиҷа манзили зисти даҳҳо нафар ҳамроҳ бо баъзе биноҳои маъмурӣ вайрону валангор шуданд.
Тибқи иттилои расмӣ, дар даргириҳои мусаллаҳонаи ҳукумат ва гурӯҳҳои маҳаллӣ 23 сарбоз ва 21 ғайринизомӣ кушта шуданд.
