Имрӯз, 7-уми сентябр ба муносибати таҷлили 30-юмин солгарди Истиқлоли давлатии Ҷумҳурии Тоҷикистон дар майдони Дӯстии шаҳри Душанбе паради ҳарбӣ баргузор гардид.
Тибқи иттилои сомонаи расмии раисҷумҳур, дар парад Эмомалӣ Рамҳон низ ба ҳайси Сарфармондеҳи Олии Қувваҳои Мусаллаҳ ва генерали артиш ширкат варзида суханронӣ карда аст.
Гуфта мешавад, дар парад 30 ҳазор сарбозону хидматчиёни ҳарбии Қувваҳои Мусаллаҳ, ҳайатҳои шахсии мақомоти ҳифзи ҳуқуқ ва афсарону сарбозони захираҳои сафарбарӣ иштирок доштаанд.
Президент Эмомали Раҳмонро дар майдони Дӯстӣ, писараш Рустами Эмомалӣ, ки вазифаи раиси Маҷлиси миллии Маҷлиси Олии Ҷумҳурии Тоҷикистон ва раиси шаҳри Душанберо бар уҳда дорад ва ҳамзамон рутбаи генералиро соҳиб аст бо вазири мудофиа генерал-полковник Шералӣ Мирзо пешвоз гирифтаанд.
Раҳмон дар суханронӣ аз нақши барҷастаи хизматчиёни ҳарбӣ ва кормандони мақомоти ҳифзи ҳуқуқи кишвар дар роҳи барқарорсозии сохти конститутсионӣ, таъмини сулҳу оромӣ ва суботи сиёсӣ гуфта, ҳозиринро ба ҷашни истиқлол табрик кард.
Дар зимн Раҳмон аз хатари тероризм ҳушдор дода афзуд:
“Вақтҳои охир вазъи минтақа ва ҷаҳон вобаста ба вусъат пайдо кардани фаъолияти ҳаракату созмонҳои террористӣ, экстремистӣ ва радикалӣ, низоъҳои диниву мазҳабӣ, қочоқи маводи мухаддир, силоҳ, ҷиноятҳои киберӣ ва дигар ҷиноятҳои муташаккили фаромиллӣ боиси ташвишу нигаронии ҷиддии сокинони сайёра, аз ҷумла мардуми мо гардидааст.”
Аммо Раҳмон, ки ҳамагӣ ҳафтае пеш бо мавзеъгириҳояш дар робита ба тақисими одилонаи қудрат дар Афғонистон ва ба хусус мушорикати тоҷикону узбекҳо ва дигар ақаллиятҳои миллӣ дар идораи ҳукумати оянда сарусадоеро ба бор оварда буд ва дертар ба Қаҳрамони миллии Афғонистон Аҳмадшоҳ Масъуд ва проффессор Бурҳониддин Раббонӣ, собиқ президенти Афғонистон орден дод, ҳоло дигар дар бораи Афғонистон ягон ҳарферо ироа накард.
Ин ҳам дар ҳолест, ки Толибон ба Панҷшер, ягона маркази тоҷикнишине, ки аз итоъати Толибон сарпечид ду ҳафта боз ҳамалоти густурдаеро ба роҳ монда ва маркази ин вилоятро ба тасарруфи худ дароварданд, чизе нагуфт.
Гуфтанист, ин парад яке аз бузургтарин парадҳои даври истиқлоли Тоҷикистон ба ҳисоб меравад. Ба иттилои сомонаи расмии Президент, дар гузашта зимни баргузории чорабиниҳои сатҳи ҷумҳуриявӣ шумораи иштирокчиёни парадҳои ҳарбӣ дар майдони марказии пойтахт асосан аз 5 то 15 ҳазор нафарро ташкил медод, аммо ҳоло дар замони коронавирус дар Душанбе иштирокчиёни парад ба 30 ҳазор нафар баробар аст.
