Бо қарори Ситоди ҷумҳуриявӣ оид ба тақвияти чораҳои зиддиэпидемикии Тоҷикистон шуруъ аз 15-уми марти соли равон фаъолияти марзҳо байни Тоҷикистон ва Узбекистон ба реҷаи оддӣ гузашта, озмоиши COVID-19 ҳатмӣ нест.
Тавре АМИТ “Ховар” аз Cитоди ҷумҳуриявӣ оид ба пурзӯр намудани чораҳои зиддиэпидемикӣ барои пешгирии интиқол ва пайдоиши сирояти нави COVID-19 дар Ҷумҳурии Тоҷикистон хабар медиҳад, баъд аз 15-уми марти соли ҷорӣ ҳангоми вуруд ба Тоҷикистон дигар аз мусофирон ташхиси вирусологӣ барои мавҷудияти ин беморӣ талаб карда намешавад. Пешниҳоди гувоҳномаи эмкунии пурраи зидди коронавирус кифоят аст. Ҷониби Тоҷикистон гувоҳномаҳо дар бораи эмкуниро, ки мақомоти расмии Узбакистон ё дигар кишварҳои ИДМ дода бошанд, расман эътироф мекунад.
Гуфта мешавад, қарори мазкур бо дарназардошти ба эътидол омадани вазъи эпидемиологии сирояти коронавирус дар Тоҷикистон ва тақвияти муносибатҳои иқтисодӣ ва фарҳангӣ бо кишвари ҳамсоя қабул карда шудааст.
“Ҳангоми ба қаламрави Тоҷикистон ворид шудани шаҳрвандони Ҷумҳурии Тоҷикистон ва шаҳрвандони хориҷӣ дар сурати пешниҳоди маълумотнома бо натиҷаи “манфӣ”-и озмоиши вирусологии кишвари хориҷшуда нисбат ба COVID-19, ки ба муҳлати то 72 соат эътибор дорад, аз гузаштани озмоиши такрорӣ дар нуқтаҳои гузаргоҳи сарҳади давлатии Ҷумҳурии Тоҷикистон озод карда мешаванд”, — омадааст дар қарор.
Ҳамчунин гуфта мешавад, ки реҷаи ҳатмии истифодаи ниқобҳои муҳофизатӣ барои пешгирӣ ва паҳншавии сирояти коронавируси COVID-19 дар байни аҳолӣ бекор карда мешавад.
