Субҳи имрӯз дар Эрон чанд вагони як қатори мусофирбар аз хатти роҳи оҳан хориҷ шуд ва дар натиҷа даҳҳо нафар кушта ва захмӣ гардид.
Бино ба иттилои расонаҳои эронӣ, тибқи охирин омори расмӣ дар ин ҳодиса 21 нафар кушта ва ба гуфтаи Расонаҳои эронӣ иллати хурӯҷи ин вагонҳоро дар бархӯрд бо бели яке “кран”, ки дар шафти роҳ кор мекардааст, гуфтаанд, аммо мудири кулли роҳи оҳани Язд гуфтааст, ки “иллати ҳодисаи Табас дар дасти баррасӣ аст.” Ин бори аввал нест, ки дар кишвари Эрон қаторҳои мусофирбар аз хатти роҳи оҳан хориҷ мешаванд ва ба садамаҳои мухталиф дучор мегарданд, балки тибқи иттилои расонаҳо танҳо дар соли гузашта беш аз 7 садамаи вагонҳо дар ин кишвар сабт шудааст, ки аксари онҳо талафоти инсонӣ доштаанд. То замони таҳияи ин матлаб кишварҳои Покистону Озарбойҷон нисбат ба ин ҳодиса ба наздикону пайвандони қурбон ва мардуми Эрон ибрози ҳамдардӣ кардаанд. Гуфта мешавад, ин қатор, ки дучори садама шудааст, дар маҷмуъ дорои 11 вагон буда ва 348 нафар (мусофир ва хадама) дошт. Пас аз расонаӣ шудани ин ҳодиса, масъулин ва созмонҳои кумакрасон ба ҷои ҳодиса ҳозир шуда, ҳама захмиҳо ва мусофиронро аз ҷои ҳодиса ба макони амн интиқол додаанд.
