Вазъи саломатии Шамил Ҳакимов, рӯҳонии бузургсоли насронӣ, ки дар Тоҷикистон ба 7,5 соли зиндон маҳкум шудааст, айни замон бад арзёбӣ мешавад.
Сенатори амрикоӣ Марко Рубио дар саҳфаи Тввирии худ дар бораи бад шудани вазъи саломатии Шамил Ҳакимов, рӯҳонии зиндонӣ дар Тоҷикистон хабар дода, гуфтааст, ки “вай бояд фавран озод карда шавад ва ба хонаводааш бипайвандад.”
Шамил Ҳакимов, яке аз се тан аз раҳбарони “Шоҳидони Яҳво”, як созмони мазҳабии мамнуъ дар Тоҷикистон аст, ки дар моҳи феврали соли 2019 аз ҷониби мақомоти Тоҷикистон бо иттиҳоми “барангехтани кинаву адовати милливу мазҳабӣ” боздошт гардида буд.
Гуфта мешавад, Додгоҳи олии Тоҷикистон фаъолияти созмони мазҳабии “Шоҳидони Яҳво”-ро соли 2007 дар қаламрави Тоҷикистон мамнуъ эълон карда буд. Ба дунболи ин қарор Додгоҳи олӣ дар солҳои баъд чандин нафар аъзои ин ҳаракати мазҳабии насронӣ боздошт ва зиндонӣ шуданд.
Шамил Ҳакимов низ ҳамчун яке аз раҳбарони ин созмон, ки пас аз соли 1992 ба он пайваста буд, 10-уми сентябри соли 2019 дар бинои Боздоштгоҳи муваққатӣ (СИЗО)-и рақами 2-и шаҳри Хуҷанд ба 7,5 соли зиндон маҳкум шуда буд.
