Ду сокини ноҳияи Рашт пас аз нӯшидани зиёди шароб маст шуда, як шаҳрвнди дигари ин ноҳияро сахт лату кӯб карданд, ки ӯ дар ҷои ҳодиса ба ҳалокат расидааст.
Тавре Додситони кулли Тоҷикистон рӯзи 2-юми декабр хабар дод, ки шаҳрвандон Ғайратов Ф.Ш. ва Саидов Ҷ.Н., ки ҳарду зодаи ноҳияи Рашт мебошанд, тобистони соли ҷорӣ дар ҳолати мастии сахт як шаҳрванди дигари ҳамин ноҳия бо насаби Юлчиевро то мурдан лату кӯб кардаанд.
Дар шарҳи ин қазия Додситонии кулли кишвар чунин менависад: “Тафтишоти пешакӣ муайян намуд, ки Ғайратов Ф.Ш. 02.08.2022 сол соати 22 бо Саидов Ҷ.Н. дар назди чойхонаи “Болои об”, воқеъ дар суроғаи ноҳияи Рашт, Ҷамоати шаҳраки Ғарм, кӯчаи Озодии занон бинои № 1 машруботи спиртӣ истеъмол намуда, дар ҳолати сахти мастӣ қарор доштанд. Онҳо шаҳрванд Юлчиев Н.О.-ро, ки бо рафиқаш дар наздикии онҳо ба хӯрдани хӯрок ва истеъмоли машруботи спиртӣ машғул буд, дида ба наздашон даъват карда, аз ҳиссиёти авбошӣ Юлчиев Н.О.- ро бо дасту пой лату кӯб карда, ба узвҳои ҳаётан муҳими бадан, сару рӯй ва гардан ҷароҳатҳои вазнини ҷисмонӣ мерасонанд, ки дар натиҷа охирин дар ҷойи ҳодиса ба ҳалокат расидааст.”
Вобаста ба ин ҳодиса, Додситони ноҳияи Рашт бо моддаи 104 қисми 2 бандҳои “з, к”-и КҶ Ҷумҳурии Тоҷикистон нисбати Ғайратов ва Саидов парвандаи ҷиноятӣ оғоз карда, пас аз таҳқиқ онро ба Додгоҳи Олии кишвар пешниҳод кард.
Додгоҳи Олии Тоҷикистон дар торихи 10.11.2022 мутобиқи моддаҳои эълоншуда, Ғайратов Ф.Ш. ва Саидов Ҷ.Н.-ро гунаҳгор дониста, ҳардуи онҳоро ба муҳлати 20 солӣ, “бо адо намудани ҷазо дар колонияи ислоҳии низомаш сахт”, аз озодӣ маҳрум кард.
Ин бори аввал нест, ки баъзе аз шаҳрвандони Тоҷикистон бо нӯшидани шароби зиёд даст ба ҷинояти сангини одамкушӣ мезананд. Чанде пеш худи Додситони кулли кишвар хабар дода буд, ки дар ноҳияи Панҷи вилояти Хатлон фарзанд падари худро пас аз нӯшидани шароб ва сархӯш шудан ба қатл расонда буд.
