Тумсо Абдураҳмонов, мухолифи машҳури Чеченистон, ки дар яке аз кишварҳои Аврупои Ғарбӣ ба сар мебурд, кушта шуд.
Бархе наздикону пайвандони Тумсо Абдураҳмонов, блогнавис ва мухолифи машҳури Рамзан Қодиров, Президенти Чеченистон аз кушта шудани ӯ дар Суид (Шведсия) хабар додаанд.
Наздикону пайвандони Тумсо Абдураҳмонов мегӯянд, ки шаби ҷумъаи 2-уми декбари соли 2022 тавассути гурӯҳе аз афрод бо зарби чанд тир кушта шудааст. Аммо дар ҳоли ҳозир дар бораи ҷузъиёти ин ҳодиса шарҳ намедиҳанд. Аз сӯи дигар, дар Суид мақомоти расмии кишвари мизбон низ дар бораи ҷузъиёти ин ҳодиса ҳоло шарҳе ба расонаҳо ироа накардаанд.
Дар ҳамин ҳол хабаргузории “Aftonbladet” иттилоъ дод, ки ба пулиси Суид тамос гирифта, пулис хабари кушта шудан ё нопадид шудани Тумсоро тайид накардааст ва дар ин бора шарҳи бештаре низ надодааст.
Ин мухолифи шинохтаи Чеченистон пеш аз он ки як мухолифи сарсахти Рамзан Қодиров бошад, вай як фаъоли ҷомеаи маданӣ буд ва ба Қуръони Карим ва улуми қуръонӣ низ алоқаманд буд. Охири коридааш ҳам дар саҳфаи телеграмиаш тафсири ояти 54 сураи Зухруф аст, ки мефармояд: “Пас Фиръавн қавми худро гумроҳ сохт, то ба ӯ итоъат кунанд, ки мардуме табаҳкор буданд.”
Гуфта мешавад, пеш аз он ки хабари кушта шудани Тумсо Абдураҳмонов тасдиқ шавад, якуми декабри соли ҷорӣ низ овозаҳое дар бораи ба қатл расидани ӯ нашр шуда буд, вале баъдтар наздиконаш онҳоро рад карда буданд.
Тумсо Абдураҳмонов дар баробари мухолифи Қодиров ва блогнавис будан, як фаъоли ҷомаи маданӣ низ буд ва соли 2015 пас аз як даргирӣ бо наздикону пайвандони Рамзан Қодиров кишварашро тарк карда, ба Аврупо панаҳ овард.
Соли 2021 вақте хабаре нашр шуд, ки мақоми паноҳандагии сиёсии худро аз кишвари Суид дарёфт кардааст, як замоне алайҳи ӯ ва бародараш Муҳаммад Абдураҳмонов фишорҳо зиёдтар шуданд.
Муҳаммад Абдураҳмонов низ, ки яке аз мухолифони Чеченистон дар Аврупо аст ва ӯ борҳо мавриди таҳдидҳо қарор гирифта буд, вале расонаҳо менависанд, ки пас аз кушта шудани Тумсо иртибот бо бародараш Муҳаммад ҳам қатъ шудааст.
