Дар вилояти Челябински Русия тафтиш ва амалиётҳои махсуси мақомоти қудратӣ болои муҳоҷирони корӣ афзоиш ёфтааст.
“Рейд”-ҳо дар макони ҷамъшавии муҳоҷирон бо иштироки кормандони идораҳои минтақавии ФСБ, ВКД, ОМОН-и Росгвардия ва намояндагони комиссариати ҳарбии маҳаллӣ баргузор шудаанд.
Гуфта мешавад, дар рафти ин амалиётҳо зиёда аз 320 муҳоҷир ва нафароне, ки ба наздикӣ шаҳрвандии Русияро ба даст овардаанд, тафтиш шуда, ба 13 нафар даъватномаи ҳарбӣ додаанд.
Ин рейдҳо асосан дар хобгоҳҳо, меҳмонхонаҳо, бозорҳо ва анборҳо баргузор гардида, мақомот чандин муҳоҷирро низ бо иттиҳоми вайрон намудани қоидаҳои будубош аз Русия ихроҷ кардаанд. Шумораи дақиқи ихҷроҷшудаҳо аз Челябинск маълум нест, аммо мақомот мегӯянд, аз аввали соли 2025 дар ин минтақа беш аз 4,5 ҳазор қонуншикании маъмурӣ дар соҳаи муҳоҷират ба қайд гирифта шуда, барои 854 нафар вуруд ба Русия манъ карда шудааст.
Инчунин кормандони мақомоти ҳифзи ҳуқуқ ҳангоми тафтиш як утоқи намозгузории – ба гуфтаашон ғайриқонуниро ошкор намуда, аз рӯи ин ҳолат бо гумони вайрон кардани қонун дар бораи озодии виҷдон ва иттиҳодияҳои динӣ, таҳқиқоти маъмуриро оғоз кардаанд.
Гуфта мешавад, дар рафти ин “рейд”-ҳо русҳо низ мавриди санҷиш қарор гирифта, нисбати як нафар бо иттиҳоми сабти ғайриқонунии 25 муҳоҷир дар хонааш парванда боз шуда, 4 нафари дигарро барои бардурӯғ ба кор қабул кардани муҳоҷирон 100 ҳазор рублӣ ҷарима ва барои аз 2 то 3 сол равонаи зиндон кардаанд.
Ҳамзамон дар вилояти Челябинск, Кумитаи тафтишот, ки раҳбарии ин ниҳодро Александр Бастрикин бар уҳда дорад, пас аз шикояти миллатгароҳои рус нуқтаҳои савдои кӯчагиро, ки бештар муҳоҷирон дар он фаъолият мекунанд, мавриди санҷиш қарор медиҳад.
Бо вуҷуди ин, дар вилоят Маркази мутобиқсозии иҷтимоӣ ва фарҳангии муҳоҷирон таъсис дода мешавад. Барои амалӣ кардани ин лоиҳа зиёда аз 54 миллион рубл ҷудо гардидааст, то муҳоҷирон бо қонунгузории маъмурӣ, ҷиноятӣ ва қоидаҳои муҳоҷират, инчунин дар бораи меъёрҳои рафтор ва иҷрои ойинҳои динӣ дар Русия шинос шаванд.
Бояд гуфт, чандест дар Русия фазои муҳоҷирбадбинӣ ба авҷи худ расида, мақомоти ин кишвар бо ҳар баҳона дар кӯчаву хобгоҳҳо ва ҳатто қаҳвахонаву бозорҳо “рейд” гузаронида, нисбати муҳоҷирон бадрафторӣ карда, онҳоро латтукӯб мекунанд ва асноди будубошу дигар ҳуҷҷатҳои зодагони кишварҳои Осиёи Марказӣ, бахусус зодагони Тоҷикистонро барои нарафтан ба ҷанги зидди Украина бекор карда истодаанд.
Инчунин дар ин муддат чандин қонунҳои наве дар Думаи давлатӣ пешниҳоду қабул гардид, ки шароити бе ин ҳам вазнини корӣ барои муҳоҷиронро мушкилтар мекунад.
