Додгоҳи шаҳри Қурғони Русия як шаҳрванди 32-солаи Тоҷикистонро барои “дашном” ва “зӯроварӣ нисбати корманди ҳифзи ҳуқуқ” маҳкум ба зиндон кард.
Гуфта мешавад, ин шаҳрванди Тоҷикистон моҳи ноябри соли 2024 аз ҷониби маъмурони пулиси шаҳри Қурғон барои “осеби ҷиддӣ ҷисонӣ расондан ба дигарон” боздошт шуда буд ва ӯ то кунун дар бодоштгоҳи муваққатии ин шаҳр нигаҳдорӣ мешуд.
Раёсати тафтишотии вилояти Қурғон дар сомонаи расмии худ хабар дода, ки ин шаҳрванди Тоҷикистон аз иҷрои талаботи қонунии корманди муассиса сарпечӣ карда, сипас бо ӯ даргир шудаст ва “дар ҷараёни муноқиша ӯ нисбат ба корманд зӯроварӣ нишон дода, ӯро дашном додааст.”
Раёсати тафтишот аз ин шаҳрванди Тоҷикистон ном набурдааст, вале менависад, ки ӯ бо ин рафтораш “қоидаҳои муқарраршудаи муассисаи ислоҳиро вайрон” кардааст.
“Бо ҳукми Додгоҳи шаҳри Қурғон, ба маҳкумшуда барои ин кирдор се солу як моҳ ҳабс дар муассисаи ислоҳии низомаш сахт таъйин карда шудааст”, — омадааст дар изҳороти мақомоти тафтишотӣ.
То ҳол назари маҳкумшуда ва ё наздиконаш вобаста ба ин қазия дастарси расонаҳо нашудааст. Инчунин маълум нест ӯ бо худ вакили дифоъ дошт ё на.
