Вазорати молияи Русия лоиҳаи қонунеро таҳия кардааст, ки бо қабули он кисаи бе ин ҳам холии муҳоҷирон дар ин кишвар холитар мешавад.
Бино ба иттилои расонаҳо, ин лоиҳаи қонун аллакай аз ҷониби мақомоти дахлдори Русия ҷонибдорӣ ёфта, 30-уми июни соли ҷорӣ дар ҷаласаи Комиссияи қонунгузории Ҳукумат баррасӣ хоҳад шуд.
Мувофиқи ин лоиҳа, муҳоҷирон аз тирамоҳи соли ҷорӣ бояд барои ба қайди муваққатӣ гузоштан дар ҷои зист 500 рубл пардохт кунанд, ҳоло ин раванд барои шаҳрвандони Русия ва хориҷиён ройгон аст.
Ҳамчунин Вазорати молия пешниҳод кардааст, ки шаҳрвандони хориҷӣ барои дароз кардани будубоши муваққатӣ 1000 рубл ва барои гирифтани иҷозатномаи кор 4200 рубл пардохт кунанд.
Гирифтани нусхаҳои дувум ва ворид кардани тағйирот ба ҳуҷҷатҳо, аз ҷумла иҷозатномаҳои кор, патентҳо ва ҳуҷҷатҳои корфармоён, ки муҳоҷиронро ба кор ҷалб мекунанд, 2100 рубл арзиш хоҳанд дошт.
Барои гирифтани патент ё аз нав ба расмият даровардани он муҳоҷирон бояд 4200 рубл пардохт кунанд, ҳоло чунин пардохт танҳо барои иҷозатномаи кор мавҷуд аст. Инчунин пешниҳод шудааст, ки андозаи пардохти давлатӣ барои сабти муҳоҷирон дар ҷои истиқомат аз 420 рубл то 1000 рубл афзоиш дода шавад.
Вазорати молияи Русия мегӯяд, ки ин қонун ба буҷа 17 миллиард рубли иловагӣ ворид мекунад.
Бояд гуфт, дар Русия фазои муҳоҷирбадбинӣ ба авҷи худ расида, давоми ду соли ахир дар ин кишвар чандин қонунҳои наве дар Думаи давлатӣ пешниҳоду қабул гардид, ки шароити бе ин ҳам вазнини корӣ барои муҳоҷиронро мушкилтар мекунад.
Инчунин дар ин муддат, мақомоти ин кишвар ҳамроҳи гурӯҳҳои миллатгаро бо ҳар баҳона дар кӯчаву хобгоҳҳо ва ҳатто қаҳвахонаву бозорҳо “рейд” гузаронида, нисбати муҳоҷирон бадрафторӣ карда, онҳоро латтукӯб мекунанд. Ҳамчунин асноди будубошу дигар ҳуҷҷатҳои зодагони кишварҳои Осиёи Марказӣ, бахусус зодагони Тоҷикистонро барои нарафтан ба ҷанги зидди Украина бекор мекунанд.
