Субҳи рӯзи 28-уми феврали соли 2026 Амрико дар ҳамроҳӣ бо Исроил ҳамлаҳои низомии худро бар зидди Эрон оғоз карданд.
Доналд Трамп, раисҷумҳури Амрико дар паёми видеоие субҳи имрӯз расман хабар дод, ки “Амрико амалиёти бузурги низомии худро алайҳи Эрон оғоз кард“.
Дар ҳамин ҳол дар шабакаҳои иҷтимоӣ наворҳои зиёде нашр шуда, ки дар осмони Эрон мушакҳо ва таркишҳои бузург дар манотиқи гуногун мушоҳида мешавад. Ҳамзамон хабаргузории “Форс” ҳамлаҳои мушакии Эрон ба пойгоҳҳои Амрико дар кишварҳои Қатар, Кувайт, Баҳрайн, Имороти Муттаҳидаи Арабиро таъйид кард.
Шабакаи “12”-и Исроил хабар дод, ки мушакҳои Эрон аллакай ба чанд бино дар шимоли Исроил исобат карда, зарарҳои зиёде расонданд. Артиши Исроил ба шаҳрвнадонаш ҳушдор дода, ки ба паноҳгоҳҳо паноҳ баранд.
Дар ҳамин ҳол расонаҳои эронӣ низ гузориш доданд, ки садои таркишҳои сахтеро дар шаҳрҳои Шероз, Теҳрон ва дигар шаҳрҳо шунидаанд.
Расонаҳои имротӣ низ гузориш доданд, ки мушакҳои эронӣ ба он кишвар партоб шудааст ва бар асари суқути пораҳои як мушаки пешгиришуда як нафар дар Абузабӣ кушта шудааст.
Вазорати хориҷии Эрон дар гузорише гуфт, ки ҳамла ба пойгоҳҳои низомии Амрико дар кишварҳои Халиҷи Форс, аз ҷумла, Қатар, Баҳрайн ва Иморот, ки аз хоки онҳо алайҳи Эрон ҳуҷум сурат мегирад, ҳаққи қонунии мост, ки онҳоро мавриди ҳамлаҳои худ қарор диҳем.
Ин ҳамлаҳо дар ҳоле сурат мегиранд, ки гуфтушунидҳо бо ҳайати эронӣ идома дошт ва мебоист рӯзи душанбе ҳайатҳои фаннии Амрико ва Эрон дар шаҳри Венаи Австрия музокираро идома диҳанд.
Вале Трамп мегӯяд, Эрон нахост сатҳи ғанисозии урониюмашро ба сифр бирасонад. Ӯ чанде пеш шаҳрвандони зиёди худро кушт. Ва ин кишвар ҳамеша дар пайи куштан аст. Трамп иддао кард, ки кишвари Эрон бузургтарин пуштибони терроризм дар ҷаҳон аст.
Иддаое, ки Эрон ҳамеша онро рад кардааст ва раисҷумҳури ин кишвар ду рӯзи қабл эълон кард, ки мо қасди сохтани силоҳи ҳастаиро надорем, зеро онро раҳбарияти олии кишвар, Алӣ Хоманаӣ ҳаром эълон кардааст. Бо ин дастур мо агар бихоҳем ҳам ба он даст ёфта наметавонем.
