Мирраҳмон Раҳмонӣ, раиси парлумони Афғонистон гуфт, ки бо хуруҷи комили нерӯҳои амрикоӣ то рӯзи 11 сентябри соли равон, эҳтимоли ҷанги шаҳрвандӣ дар ин кишвар вуҷуд дорад.
Ба иттилои ВВС, ҷаноби Раҳмонӣ рӯзи чоршанбе 14 апрел зимни як нишасте дар Кобул гуфт, ки нерӯҳои хориҷӣ дар ҳоле Афғонистонро тарк мекунанд, ки ҷанг дар ин кишвар ба шиддат ҷараён дорад.
Раиси парлумони Афғонистон афзуд, “агар шароити Афғонистон барои хуруҷи нерӯҳои хориҷӣ фароҳам мебуд, хуруҷи онҳо орзуи мардуми Афғонистон буд, аммо ин шароит ҳанӯз ҳам фароҳам нашудааст.”
Ба гуфтаи вай, бо хуруҷи нерӯҳои хориҷӣ, “эҳтимоли бозгашт ба даврони ҷангҳои хатарноки дохилӣ вуҷуд дорад ва Афғонистон дубора ба қаламрави терроризми байналмилалӣ мубаддал хоҳад шуд.”
Дар ҳамин ҳол Ваҳид Умар, мушовири аршади раисҷумҳури Афғонистон дар умури равобити умумӣ гуфта, ки нерӯҳои амниятии Афғонистон ҳамакнун 98% амалиёти низомиро мустақилона анҷом медиҳанд. Ва дар оянда ҳам тавонмандии анҷоми чунин амалиётро доранд.
Ҳамчунин ду сол қабл ҳукумати Афғонистон низ гуфта буд, ки хуруҷи нерӯҳои хориҷӣ бар раванди таъмини амнияти Афғонистон таъсир нахоҳад дошт.
Он замон гуфта мешуд, ки дар чаҳоруним соли гузашта бори ҷанг ва таъмини амнияти ин кишвар бар дӯши худи нерӯҳои амниятӣ ва дифоии Афғонистон буд ва нерӯҳои хориҷӣ дар заминаи омӯзиш, машварат ва ҳимояти фаннии нерӯҳои Афғонистон фаъол буданд ва ҳеч таъсире дар раванди таъмини амнияти Афғонистон нахоҳад дошт.
Мақомоти давлати Амрико таъйид карданд, ки ин кишвар қасд дорад нерӯҳояшро пеш аз 11 сентябр аз Афғонистон хориҷ кунад.
Масъалаи хуруҷи нерӯҳои низомии хориҷӣ аз Афғонистон яке аз шартҳои ризоият ба сулҳ аз ҷониби Толибон аст.
