Аз 11-уми майи соли 2026 байни Арабистони Саудӣ ва Русия низоми сафари дуҷонибаи бидуни раводид расман мавриди амал қарор гирифт. Акнун шаҳрвандони ду кишвар метавонанд бидуни гирифтани виза ба қаламрави якдигар сафар кунанд.
Тибқи созишномаи нави байни ду кишвар, шаҳрвандони Русия ва Арабистони Саудӣ ҳақ доранд то 90 рӯз дар давоми як сол барои ҳадафҳои сайёҳӣ, тиҷоратӣ ва ё дидор бо наздикон дар кишвари ҳамдигар бимонанд. Созишнома ҳамаи навъҳои шиносномаҳо, аз ҷумла дипломатӣ, хидматӣ ва одиро дар бар мегирад.
Ба иттилои расонаҳои Саудӣ, Русия нахустин кишваре мебошад, ки Арабистони Саудӣ бо он низоми дуҷонибаи лағви раводидро барои дорандагони шиносномаҳои одӣ ҷорӣ мекунад. Ин иқдом ҳамчун бахше аз густариши равобити сиёсӣ, иқтисодӣ ва гардишгарӣ байни Маскав ва Риёз арзёбӣ мешавад.
Дар айни замон, мақомот таъкид кардаанд, ки ин низом ба сафарҳои корӣ, таҳсил, иқомати доимӣ ва инчунин адои маросими Ҳаҷ татбиқ намешавад ва барои чунин сафарҳо ҳамоно гирифтани раводиди махсус зарур хоҳад буд.
Ин ҳам дар ҳолест, ки хеле аз муҳоҷирони зодагони Тоҷикистон, ки дар Русия кору зиндагӣ мекунанд, шаҳрвнадии ин кишварро ба даст оварданд. Ва бо шунидани ин хабар изҳори умедворӣ мекунанд, ки дар оянда сафар барои ибодати умра ва саёҳати Арабистони Саудӣ барояшон осонтар хоҳад шуд.
