Мақомоти Арманистон ду зодаи Язгуломи ноҳияи Ванҷро, ки қаблан боздошт карда буд, ба Тоҷикистон супурдааст.
Бино ба иттилои расонаҳо, яке аз онҳо моҳи августи соли 2025 ва дигаре моҳи феврали соли ҷорӣ аз ҷониби мақомоти Арманистон дастгир шуда будаанд.
Ин ду нафар дар Тоҷикистон ба “зархаридӣ”, “ташкили иттиҳоди ҷиноӣ” ва “қочоқи маводи мухаддир” гумонбар мебошанд, иттиҳомоте, ки наздиконашон онро рад мекунанд.
Гуфта мешавад, ин шаҳрвандони Тоҷикистон ҳафтаи гузашта бо роҳи заминӣ ба Душанбе фиристода шуданд. Ин ҳам дар ҳолест, ки Арманистон қасд дошта онҳоро бо ҳавопаймо интиқол диҳад, аммо ба сабаби муноқишаи боздоштшудагон бо намояндагони Тоҷикистон дар фурудгоҳ, ин раванд ба таъхир афтодааст.
Яке аз онҳо Муҳаммад Нуралиев ном дошта, қаблан дар Душанбе зиндагӣ мекардааст. Наздиконаш ба Радиои Озодӣ гуфтаанд, ки Нуралиев ҳоло дар боздоштгоҳи Раёсати мубориза бо ҷиноятҳои муташаккил дар пойтахт нигоҳ дошта мешавад ва ӯро то ҳол надидаанд.
Пештар вакилони Маркази кумаки ҳуқуқӣ дар Ереван изҳор дошта буданд, ки аз сарнавишти ин ду нафар иттилоъ надоранд ва аз эҳтимоли супурдани онҳо ба Тоҷикистон нигарон ҳастанд. Ба гуфтаи онҳо, дар Тоҷикистон ин нафарро хатари шиканҷа, муносибати бераҳмона ва ҳукмҳои тӯлонии зиндон таҳдид мекунад.
Дар як соли охир дар марзи Арманистон панҷ шаҳрванди Тоҷикистон боздошт шудаанд. Аз онҳо ду нафар ба Душанбе супурда шуда, се нафари дигар озод гардидаанд. Дар миёни озодшудагон Бобосуфи Рауфӣ, писари рӯзноманигори шинохтаи тоҷик Зафар Суфӣ, Исмоил Холов, узви “Гурӯҳи 24” ва корманди собиқи ОМОН-и ВКД-и Тоҷикистон Асомуддин Раҷабови 46-сола, ки бо дархости Душанбе дар марз бо Гурҷистон боздошт шуда буд, мебошанд.
