Бино ба иттилои ғайрирасмӣ, ҷасади 9 шаҳрванди Тоҷикистон дар яке аз сардхонаҳои шаҳри Ростов-на-Дону-и Русия нигоҳдорӣ мешаванд.
Дар ин бора блогери тоҷик маъруф ба “ismoiltojik” дар саҳифаи фейсбукияш эълонеро нашр кардааст, ки дар он аз наздикон ва пайвандони ин афрод даъват мешавад ҳарчи зудтар барои шиносоӣ ва гирифтани ҷасадҳо ба мақомоти дахлдор муроҷиат кунанд.
Дар рӯйхати нашршуда ном, насаб ва санаи таваллуди шаҳрвандон оварда шудааст. Умри шаҳрвандони дар рӯйхатбуда аз 20 то 53 солро ташкил медиҳад. Аммо дар бораи сабаб, вақт ва маҳалли марги онҳо ҳеҷ гуна маълумоти расмӣ пешниҳод нашудааст.
То кунун мақомоти Тоҷикистон ва Русия низ дар бораи ин қазия изҳороти расмӣ нашр накардаанд ва маълум нест, ки ин шаҳрвандон дар кадом шароит ҷон бохтаанд.
Дар моҳҳои охир дар минтақаҳои ҷанубии Русия, аз ҷумла вилояти Ростов, чандин ҳамлаҳои дронӣ ва мушакӣ сурат гирифтаанд. Бо вуҷуди ин, ҳеҷ далеле вуҷуд надорад, ки марги ин шаҳрвандони Тоҷикистон ба ҳамлаҳои Украина ба Русия рабт дошта бошад.
Қаблан бештар хабарҳо дар бораи фавти муҳоҷирони тоҷик дар хориҷ аз кишвар бо сабабҳои беморӣ, садамаҳои нақлиётӣ ва риоя нашудани қоидаҳои бехатарӣ дар ҷойи кор нашр мешуданд. Аммо дар шароити идомаи ҷанги Русия ва Украина, хатари осеб дидани муҳоҷирон бар асари амалиётҳои низомӣ низ афзоиш ёфтааст.
Бо вуҷуди ин, дар мавриди ин 9 шаҳрванди Тоҷикистон то ҳол ягон маълумоти расмӣ дар бораи робитаи эҳтимолии марги онҳо бо ҷанг ё ҳамлаҳои ҳавоӣ вуҷуд надорад.
