Корхонаи коркарди нафти Омск, ки бузургтарин корхонаи коркарди нафт дар Русия ба ҳисоб меравад, пас аз ҳамлаи паҳподии Украина дар рӯзи 6-уми июл фаъолияти худро муваққатан қатъ кардааст. Дар ин бора хабаргузории Reuters бо такя ба манбаъҳои худ хабар дод.
Тибқи гузоришҳо, дар натиҷаи ҳамла воҳиди асосии коркарди нафт оташ гирифта, осеби ҷиддӣ дидааст. Аз ин сабаб, фаъолияти ду воҳиди муҳими истеҳсолӣ боздошта шудааст. Мақомоти Русия ҳамла ба корхонаро тасдиқ карда, гуфтаанд, ки дар натиҷаи он талафоти ҷонӣ ба қайд гирифта нашудааст ва корҳои барқарорсозӣ идома доранд.
Корхонаи Омск, ки ба ширкати «Газпром нефт» тааллуқ дорад, иқтидори коркарди тақрибан 21 миллион тонна нафт дар як солро дошта, яке аз таъминкунандагони асосии бензин ва дизел дар Русия ба шумор меравад. Ин корхона дар масофаи тақрибан 2700 километр аз марзи Украина ҷойгир буда, ҳамла ба он яке аз дуртарин ҳамлаҳои паҳподии Украина аз оғози ҷанг арзёбӣ мешавад.
Ба гуфтаи мақомоти Украина, ҳадаф аз чунин ҳамлаҳо коҳиш додани имкониятҳои Русия барои таъмини сӯзишвории нерӯҳои низомӣ мебошад.
Ин дар ҳолест, ки дар баъзе минтақаҳои Русия аллакай нишонаҳои камбуди сӯзишворӣ ба назар мерасад. Дар чанд шаҳри ин кишвар, аз ҷумла Омск, дар нуқтаҳои фурӯши сӯзишворӣ сафҳои тӯлонӣ ба вуҷуд омада, бархе аз нуқтаҳои фурӯши бензин барои муштариён бензину дизелро ба андозаи маҳдуд мефурӯшанд.
