Кишвари Австралия эътирофномаи худ дар бораи ба расмият шинохтани Қудси Ғарбӣ ҳамчун пойтахти Исроилро бекор мекунад.
Тавре расонаҳои Австралия хабар медиҳанд, Вазорати корҳои хориҷаи ин кишвар субҳи рӯзи сешанбе бо пахши изҳороте гуфт, ки қарори ба расмият шинохтани Қудси Қарбӣ ҳамчун пойтахти Исроил бекор карда мешавад.
Пенни Вонг, вазири корҳои хориҷаи Австралия имрӯз, 18-уми октябр гуфт, ки ҳукумати феълӣ тасмими ҳукумати қаблиро дар мавриди ба расмият шинохтани Қудси Ғарбӣ ҳамчун пойтахти Исроил бекор мекунад. Ӯ ин эътирофро як “найранги беҳаёона” хонда, таъкид кард, ки ҳукумати қаблӣ барои дарёфти пуштибонӣ дар интихобот ба ин иқдом даст зада буд.
Вонг мегӯяд, масъалаи Қудс бояд бо роҳҳои осоишта ва суломез байни худи фаластиниҳо ва исроилиҳо ҳал шавад. Ӯ мегӯяд, Австралия дӯсти содиқи Исроил аст ва ҳамзамон аз мардуми Фаластин пуштибонӣ хоҳад кард.
Вазири корҳои хориҷаи Авсралия таъкид карда, ки сафаорати Австралия дар Тел-Авив буд ва онҷо мемонад ва қарор нест онро ба Қудси Ғарбӣ бикӯчонанд.
Мақомоти Исроил ба изҳороти вазири хориҷаи Австралия вокуниш карданд. Аз ҷумла, имрӯз сафири ин кишвар дар Исроил ба Вазорати корҳои хориҷаи он эҳзор шудааст.
Ёдовар мешавем, ки соли 2018 Доналд Трамп, расиҷумҳури собиқи Амрико Қудсро пойтахти Исроил эълом кард ва пойтахти худро аз Тел-Авив ба Қудси Қарбӣ кӯчонд, вале ин тасмимро аксари кишварҳои дунё эътироф накарданд. Ҳамзамон СММ ҳам бо судури Қатъномае, ки аксарияти қотеъи кишварҳо ба ин тасмими Трамп мухолифат карданд, Қудсро ҳамчун пойтахти Исроил эътироф накард.
