Аз 1-уми сентябри соли 2026 дар Русия чанд қонуни наве ба иҷро медароянд, ки назорат аз болои муҳоҷирон сахттар мешавад. Дар ин бора раиси Думаи давлатии Русия Вячеслав Володин хабар дод.
Яке аз тағйироти асосӣ ба муоинаи тиббии шаҳрвандони хориҷӣ рабт дошта, хориҷиёне, ки бояд аз чунин муоина гузаранд, барои анҷоми он 30 рӯз муҳлат хоҳанд дошт. Қаблан дар баъзе ҳолатҳо ин муҳлат то 90 тамдид мешуд.
Дар ҷараёни муоина шаҳрвандони хориҷӣ барои муайян кардани бемориҳои сироятии барои дигарон хатарнок, ВНМО ва ҳамчунин истифодаи маводи мухаддир ё баъзе доруҳои психотропӣ санҷида мешаванд.
Натиҷаи муоина ба шакли электронӣ сабт шуда, муассисаҳои тиббӣ вазифадор мешаванд маълумоти заруриро дар давоми 24 соат ба Вазорати корҳои дохилии Русия ирсол кунанд ва агар дар шахс бемории сироятии хатарнок ошкор шавад, маълумот ба Роспотребнадзор низ фиристода мешавад.
Ба гуфтаи Володин, дар сурати ошкор шудани чунин беморӣ, мақомот метавонанд барои ихроҷи фаврии шаҳрванди хориҷӣ аз Русия чора андешанд.
Тағйироти дигар ба низоми назорати муҳоҷирон дар Маскав ва вилояти Маскав дахл дошта, доираи шаҳрвандони хориҷие, ки ба низоми махсуси бақайдгирӣ ва назорат шомил мешаванд, васеъ мегардад. Ба ин гурӯҳ хориҷиёне низ дохил мешаванд, ки бидуни раводид ба Русия омада, беш аз 90 рӯз дар Маскав ё вилояти Маскав бо ҳадафҳои ғайрикорӣ қарор доранд.
Ҳамзамон барои баъзе гурӯҳҳо истисно пешбинӣ шудааст. Аз ҷумла, ин талабот ба ноболиғон, шаҳрвандони Беларус, кормандони дипломатӣ ва баъзе гурӯҳҳои дигари хориҷиён дахл нахоҳад дошт.
Ин низоми озмоишии назорат аз 1-уми сентябри соли 2026 оғоз шуда, қарор аст то моҳи сентябри соли 2029 идома кунад.
Ҳамчунин аз моҳи сентябр Хадамоти федералии андози Русия низ метавонад маълумоти шаҳрвандони хориҷиро зудтар дарёфт кунад. Барои ин миёни ниҳодҳои давлатӣ механизми нави мубодилаи электронии маълумот роҳандозӣ шуда, ин тағйирот бояд раванди ба қайд гирифтани хориҷиёнро дар мақомоти андоз тезтар кунад.
Раиси Думаи давлатии Русия Вячеслав Володин гуфтааст, ки ин чораҳо ба мубориза бо муҳоҷирати ғайриқонунӣ, такмили сиёсати муҳоҷират ва боло бурдани сатҳи амнияти ҷамъиятӣ равона шудаанд.
