Шаҳноза Шарипова, блогери тоҷик дар наворе аз баҳси хонаводагии худ нақл карда, бародаронашро гунаҳкор меҳисобад.
Ин блогери тоҷик, дар саҳифаи Инстаграми худ аз баҳси хонаводагӣ, бо бародаронаш бар сари манзиле, ки ба гуфтаи ӯ аз модараш ба мерос мондааст, хабар додааст. Ӯ дар чанд навори видеоӣ, ки ахиран нашр кардааст, бародаронашро ба беэътиноӣ нисбат ба модар дар давраи беморӣ муттаҳам мекунад.
Шарипова дар яке аз ин наворҳо бо гиря мегӯяд, ки бародаронаш дар замони зинда будани модарашон аз ӯ хабар намегирифтанд ва дар нигоҳубини ӯ саҳм надоштанд. Ба гуфтаи вай, аз соли 2023 модараш бемор буд ва ӯро пайваста ба беморхона мебурд ва парасторӣ мекард.
Шарипова ҳамчунин аз бародаронаш шикоят мекунад, ки ба гуфтаи ӯ нисбаташ рафтори таҳқиромез доранд ва суханони носазо мегӯянд.
Ӯ ҳамчунин мегӯяд, ки зани танҳо буда, саробонии се фарзандро бар дӯш дорад. Ба гуфтаи блогер, баҳси кунунӣ ба манзиле марбут аст, ки пас аз даргузашти модараш ӯ онҷо зиндагӣ мекунад.
То ҳол назари бародарон ё наздикони Шаҳноза Шарипова дар робита ба ин баҳс дастрас нест.
Коршиносон мегӯянд, баҳсҳои марбут ба мерос аз ҷумлаи баҳсҳои маъмул дар муҳити хонаводагӣ ба шумор мераванд. Бо густариши шабакаҳои иҷтимоӣ, дар солҳои охир бархе аз чунин ихтилофҳо аз доираи оила берун рафта, ба фазои маҷозӣ кашида мешаванд.
Ба назари ҷомеашиносон, ба фазои оммавӣ баровардани баҳсҳои хусусӣ метавонад таваҷҷуҳи ҷомеаро ҷалб кунад, аммо ҳамзамон хатари амиқтар шудани ихтилоф ва осеб дидани муносибатҳои хонаводагиро низ ба миён меорад. Онҳо таъкид мекунанд, ки баҳсҳои марбут ба мерос ва моликият бештар бояд тавассути муколама, миёнравӣ ва ё дар доираи қонун ҳаллу фасл шаванд.
