Бонки аврупоии таҷдид ва рушд барои татбиқи лоиҳаи “Кам намудани талафоти нерӯ” ба Тоҷикистон 43 миллион евро кумак мекунад.
Бино ба иттилои Вазорати молияи Тоҷикистон, рӯзи 4-уми декабри соли ҷорӣ дар ин ниҳод созишномаҳои қарзӣ ва грантӣ бо Бонки аврупоии таҷдид ва рушд ба имзо расид.
Гуфта мешавад, созишномаҳои мазкур аз ҷониби вазири молияи кишвар Қаҳҳорзода Файзиддин Саттор ва намояндаи доимии Бонки аврупоии таҷдид ва рушд дар Тоҷикистон Холгер Вифел ба имзо расонида шуданд.
Ба иттилои ин ниҳод, “арзиши умумии созишномаҳои мазкур 43,0 млн евроро ташкил дода, аз он 28,0 млн евро маблағҳои қарзӣ ва 15,0 млн евро маблағҳои грантии Фонди сармоягузории Осиё-Уқёнуси Ороми Иттиҳоди Аврупо мебошад.”
Ҳадафи асосии ин қарзҳо ва грантҳо кумак ба татбиқи лоиҳаи “Кам намудани талафоти нерӯ” буда, дар чорчӯби он навсозии зерсохторҳои ҳисобдорӣ ва насби ҳисобкунакҳои барқӣ дар шабакаҳои тақсимоти нерӯи барқ дар вилоятҳои Хатлон ва Суғд мебошад.
Вазорати молияи Тоҷикистон тафсилоти ин лоиҳаро нашр накардааст ва маълум нест, бо ин маблағ ғайр аз “навсозии зерсохторҳои ҳисобдорӣ ва насби ҳисобкунакҳои барқӣ” боз барои кам кардани талафоти нерӯи барқ кадом корҳоро иҷро мекунанд.
Кумаки БАТР ба лоиҳаи мазкур дар ҳолест, ки дар тамоми шаҳру ноҳияҳои Тоҷикистон дар ин шабу рӯзҳо маҳдудияти нерӯи барқ ба шиддат ҷорӣ шудааст ва ба мардум дар як шабонарӯз камтар аз 2-3 соат барқ дода мешавад. Ба гуфтаи сокинон, чунин маҳдудияти барқ собиқа надоштааст.
Қаблан ниҳодҳои тақсимоти барқ, бахусус масъулони “Барқи тоҷик” борҳо гуфта буданд, ки аҳолӣ аз барқ қарздор аст ва талафоти нерӯ аз ҷониби аҳолӣ зиёд ба чашм мехӯрад. Ба гуфтаи коршиносон, масъулон пайваста аҳолиро барои сарфаи нерӯи барқ тавсия медиҳанд, дар ҳоле ки барқ қариб ки вуҷуд надорад.
