Вазорати дифои Кувайт рӯзи душанбе аз суқути чанд ҳавопаймои ҷангии F-15E Амрико дар хоки ин кишвар хабар дод. Вале маълум нест, шумори дақиқи ҳавопаймоҳо чандто аст.
Мақомоти кувайтӣ гуфтаанд, ки халабонҳои ҷангандаҳои амрикоӣ солиманд, вале сабаби суқуқти онҳоро нагуфтаанд. Танҳо гуфта мешавад, ки барои фаҳмидани сабаби суқуқти ҷангандаҳо таҳқиқот оғоз шудааст.
Дар ҳамин ҳол ниҳоди Фармондеҳии марказии Амрико дар шабакаи Х суқути ҷангандаҳои ҳарбии F-15E-ро таъйид карда, шумори онҳоро сето гуфт. Ин ниҳод сабаби суқуқти ҷангандаҳоро “дар пайи оташи худӣ” унвон кардааст.
“Якуми март тарқрибан соати 11-и шаби ба вақти шарқи Амрико се ҷангандаи F-15E Strike Eagles марбути артиши Амрико, ки дар ҳимоят аз амалиёти “Epic Fury” парвоз мекарданд, бар фарози Кувайт дар пайи як ҳодисаи зоҳиран ношӣ аз оташи худӣ суқут карданд.”, омадааст дар хабари Фармондеҳии марказии Амрико.
Ин ниҳоди амрикоӣ мегӯяд, дар ҷараёни ҳамлаҳои Эрон бо мушакҳои баллестикӣ ва паҳподҳо ба пойгоҳҳои Амрико дар Кувайт, ин ҷангандаҳои нерӯҳои ҳавоии Амрико ба иштибоҳ тавассути падофанди ҳавоии Кувайт ҳадаф қарор гирифтанд.
Аммо Вазорати дифои Эрон мегӯяд, суқути ҷангандаҳои амрикоӣ дар Кувайт кори дасти онҳо буд. Хабаргузориҳои эронӣ ба нақл аз Вазорати дифои ин кишвар навиштанд, ки Эрон бо сарнагун кардани ҷангандаҳои амрикоӣ дар Кувайт “шоҳкорӣ” кардааст.
Ин ҳам дар ҳолест, ки бори охир 27 сол пеш дар ҷанги Косова як ҳавопаймои ҷангии Амрико F-117 тавассути Югославия сарнагун шуда буд.
Ёдовар мешавем, ки Амрико ва Исроил дар як амалиёти муштарак субҳи 28-уми феврали соли ҷорӣ ба Эрон ҳамла карданд. Бо гузашти чанд соат аз оғози ҳамла Доналд Трамп аз кушта шудани раҳбари инқилоби Эрон Алӣ Хоманаӣ хабар дод. Аммо пас аз 4 соати эълони Трамп, мақомоти Эрон ҳам расман кушта шудани Хоманаиро эълон карданд.
То кунун ҳамлаҳои тарафҳо идома дорад. Эрон дар умум аз кушта шудани 555 нафар ва даҳҳо захмии дигар хабар дод. Ҳамзамон Амрико кушта шудани 4 сарбозашро эълон кард хамиёнро 5 нафар гуфт. Исроил омори дақиқе ироа накардааст, аммо расонаҳо дасти кам аз кушта шудани 10-12 нафар иттилоъ медиҳанд.
