Ҳоким Холиқзода, муовини якуми сарвазири Ҷумҳурии Тоҷикистон бо намояндаи Бонки Осиёии сармоягузориҳои инфрасохторӣ дар Вашингтон мулоқот кард.
Бино ба иттилои хабаргузории давлатии “Ховар”, ноиби президент, котиби корпоративии Бонки Осиёии сармоягузориҳои инфрасохторӣ Шерард Каупер-Коулз зимни мулоқот бо намояндаи тоҷик раванди татбиқи лоиҳаҳои муштарак, ки бонки мазкур то соли 2025 бештар аз $410 млн барои онҳо ҷудо карда аст, аз ҷумла дар соҳаҳои энергетика, нақлиёт ва инфрасохтори иҷтимоӣ мавриди баррасӣ қарор дод.
Гуфта мешавад, вохурӣ рӯзи 14-уми апрели соли ҷорӣ дар доираи ҷаласаҳои солонаи Хазинаи байналмилалии асъор ва Гурӯҳи Бонки ҷаҳонӣ дар шахри Вашингтони ИМА анҷом шудааст.
Чониби Точикистон дар ин ҷаласа иброз дошта, ки густариши ҳамкорӣ дар самтҳои зикршуда ва ҷалби сармоягузориҳои дарозмуддат барои таъмини рушди устувори иқтисодӣ ва тақвияти ҳамгироии минтақавии Тоҷикистон аҳамияти муҳим дорад ва Тоҷикистон татбиқи ислоҳоти сохторӣ ва ҷалби сармоягузориҳои хориҷиро идома медиҳад.
Ин дар ҳолест, ки созмонҳои мустақили байналмилалӣ ва бархе кишварҳо сатҳи фасод дар Тоҷикистонро хеле зиёд, густарда ва решаӣ дониста, ба сармоягузорон аз вуҷуди фасод дар тамоми сутуҳи идории кишвар ва маблағгузорӣ дар Точикистон ҳушдор медиҳанд.
Аз ҷумла, вебсайти расмии ҳукумати ИМА барои иттилоъ додан ба сармоягузорони ин кишвар, Тоҷикистонро кишваре, ки тақозои зиёде барои сармоя дорад ва дорои потенсияли рушд муаррифӣ мекунад, вале аз вуҷуди фасод дар тамоми лояҳои ҳукумат ва сахтгириҳои идорӣ ҳушдор медиҳад.
Тахлилгарон низ мегуянд, мақомдорони марбута ҳоло ба дунболи ҷалби бештари сармояи хориҷӣ хастанд, ки маъмулан аз чунин роҳҳо суди ҳангуфте насибашон мешавад, вале манофеи миллӣ барояшон чандон арзише надорад.
