Ду зани тоҷик ҳамроҳ бо панҷ фарзанди ноболиғашон, се рӯз пеш аз паноҳгоҳи “Ал-Ҳавл”-и Сурия фирор карда будаанд, боздошт гардидаанд.
Гуфта мешавад, занҳо қасд доштаанд, ки худро ба Туркия расонанд, вале дар роҳ боздошт гарида боз ба паноҳгоҳ бурда шуданд.
Радиои Озодӣ аз манбааш аз паноҳгоҳи “Ал-Ҳавл”-и Сурия навиштааст:
“Онҳо ба тарафи марзи Туркия рафтанӣ будаанд, ки дар қарибии Идлиб боздошт гардидаанд. Аз паноҳгоҳ чӣ хел баромадаанд, касе намедонад. Ин ҷо сахт назорат мешавад. Мо намедонем, ки онҳо ба Туркия рафтанӣ буданд ё ҷойи дигар. Пештар, занҳо барои бозгашт ба Тоҷикистон кушиш мекарданд, ки то Туркия раванд”,-гуфтааст, манбаъ.
Аз руйи омори мавҷуда, ҳоло дар паноҳгоҳи “Ал-Ҳавл”-и Сурия зиёда аз 400 зану кӯдаки ҷангиёни тоҷики созмони “Давлати исломӣ” нигаҳдорӣ мешаванд. Ин паноҳгоҳ пӯшида буда, низомиёни курд онро посбонӣ мекунанд.
Бино ба иттилои Радиои Озодӣ яке аз занҳои фироркардаи боздоштшуда ҳамсари ҷангҷӯи тоҷик Шаҳбози Музафар, ки дар сафи гурӯҳи ДОИШ бо лақаби Абу Аюби Кӯлобӣ шинохта мешуд, будааст. Шаҳбоз ҳоло дар зиндони Африн нигоҳдорӣ мешавад.
Занҳои боздоштшудаи тоҷик аз шароити бади паноҳгоҳи мазкур шикоят кардаанд. Онҳо мегӯянд, “шароит хеле бад аст ва ҳар нафаре имкони фирор пайдо кунад, аз он ҷо мегурезад”.
Гуфта мешавад, ки занону кӯдакон дар паноҳгоҳи мазкур аз оби нӯшокӣ ва маводи озуқа танқисӣ доранд ва инчунин дар зимистон хаймаҳояшон хеле сард аст.
Созмони Милали Муттаҳид чанде пеш шароити нигоҳдории паноҳгоҳи “Ал-Ҳавл”-и Сурияро “ваҳшатнок” гуфта буд.
Ин занону кӯдакони тоҷик пас аз шикасти гурӯҳи ба ном “Давлати исломӣ” солҳои 2017-2018 ба дасти размандагони курд асир афтоданд ва ҳоло дар урдӯгоҳҳои зери назари Созмони Милали Муттаҳид дар чанд шаҳри Сурия нигаҳдорӣ мешаванд.
Тибқи оморҳои ахир то моҳи октябри соли равон дар умум дар худи паноҳгоҳи “Ал Ҳавл” ҳудуд 40 ҳазор зану кӯдаки доишиён аз 53 давлати дунё нигаҳдорӣ мешаванд. Баъзе давлтаҳо шаҳрвандони худро ба ватанҳояшон баргардонидаанд ва баъзе дигар чандон моил нестанд, ки онҳоро баргардонанд, чун аз ояндаашон эҳсоси хатар мекунанд.
