Додгоҳи ҷиноятии Сурия собиқ президенти ин кишвар Башор Асадро ғоибона ба ҷазои қатл маҳкум кард. Ӯ дар ҷиноятҳои зидди башарият, аз ҷумла куштори қасдан, шиканҷа ва боздоштҳои худсарона дар давраи ҷанги шаҳрвандии Сурия гунаҳкор дониста шудааст.
Ба иттилои расонаҳои давлатӣ ва байналмилалӣ, Додгоҳи чоруми ҷиноятии шаҳри Димишқ рӯзи 11-уми августи соли 2026 ҳукми худро нисбат ба Башор Асад содир кард. Ин нахустин ҳукми додгоҳии расмӣ алайҳи президенти собиқи Сурия пас аз суқути ҳукумати ӯ дар моҳи декабри соли 2024 ба шумор меравад.
Додгоҳ Асадро дар содир кардани ҷиноятҳои зидди башарият, аз ҷумла куштори ғайринизомиён, шиканҷа, боздоштҳои худсарона ва дигар нақзҳои ҷиддии ҳуқуқи инсон дар ҷараёни ҷанги шаҳрвандии Сурия гунаҳкор донист. Ҳукм ба таври ғоибона содир шудааст, зеро Башор Асад пас аз суқути ҳукуматаш аз кишвар фирор кардааст.
Ҳамзамон додгоҳ бародари ӯ Моҳир Асад ва чанде аз масъулони пешини низоми амниятии Сурияро низ дар ҳамин парванда гунаҳкор донист.
Башор Асад аз соли 2000, пас аз даргузашти падараш Ҳофиз Асад раҳбарии Сурияро ба даст гирифт. Ҳукумати ӯ соли 2011 бо эътирозҳои оммавӣ рӯбарӯ шуд, ки баъдан ба ҷанги шаҳрвандии тӯлонӣ табдил ёфт. Ин ҷанг ба яке аз хунинтарин низоъҳои асри XXI мубаддал гардида, дар пайи он садҳо ҳазор кушта ва миллионҳо нафар маҷбур шуданд хонаҳои худро тарк кунанд.
Моҳи декабри соли 2024 нерӯҳои мухолифи мусаллаҳ вориди Димишқ шуданд ва ҳукумати Асад суқут кард. Собиқ президент баъдан ба Русия фирор намуда, дар он ҷо паноҳандагӣ гирифт. То кунун Маскав дар бораи эҳтимоли истирдоди ӯ ба мақомоти нави Сурия изҳори назар накардааст. Маълум нест ҳукми қатл дар ҳоли ҳозир нисбати Башшор Асад чӣ гуна иҷро мешавад.
