Боздошти гурӯҳии тоҷикон дар Петербурги Русия

Расонаҳои Русия бо такя ба Мақомоти ҳифзи ҳуқуқи шаҳри Санкт-Петербурги Русия хабар медиҳанд, ки як гурӯҳ шаҳрвандони Тоҷикистон бо иттиҳоми терроризим боздошт шудаанд.

Амалиёти боздошти онҳо 29 июл сурат гирифта ва нисбати якеи онҳо - Комилов Идибек Балаҷонович бо иттиҳоми “мусоидат ба фаъолияти террористӣ бо роҳи маблағгузорӣ” парвандаи ҷиноятӣ ифтитоҳ шудааст.

Комилов ба он гумонбар мешавад, ки барои ҳамватанаш Нурмуҳаммад Нурматов барои сафар ба Сурия чипта харидааст. Ҳамроҳи Идибек Комилов 6 муҳоҷири дигар аз Тоҷикистон, ки бо ӯ дар як хона зиндагӣ доштанд, низ дастгир шудаанд.

Хадамоти амниятии  Русия видеои боздошти  ин 7 шаҳрванди Тоҷикистон дар  шаҳри Санкт-Петербургро нашр кардааст. Ин 7 нафар субҳи барвақти 29 июл дар ҳудуди ноҳияи Киров дастгир шуданд. Дар видеои нимдақиқагии ФСБ дида мешавад, ки яке аз зодагони Тоҷикистонро дар кӯча дастгир мекунанд ва бақияро дар манзили иҷораашон дар ҳоле боздошт карданд, ки хоб буданд. Дар видео дида мешавад, ки ҳамаи боздоштшудаҳо рӯ ба замин хоб ҳастанд.

Дар хабари расмӣ гуфта мешавад, ки ин нафарон аз назари таблиғоти терроризм ва ҷалби шаҳрвандони Русия ба сафи сохторҳои террористӣ санҷида мешаванд. ФСБ гуфтааст, ки гӯё ин нафарон “дар фикри куштори низомиён ва кормандони сохторҳои ҳифзи қонуни Русия буда, баъди ин мехостанд барои ширкат дар созмони байналмилалии террористӣ ба яке аз кишварҳои Ховари Миёна бираванд”.  

Хабари боздошт шудани гумонбарони ДИИШ дар ҳолест, ки рӯзи 27 июл ФСБ аз кушта шудани як зодаи дигари Осиёи Марказӣ дар шаҳри Химки хабар дод, ки гӯё узви созмони террористӣ будааст. Баъдан матбуоти расмӣ гуфт, ки эҳтимолан ин шахс шаҳрванди 19-солаи Тоҷикистон бо номи Одил Қаюмов буд. Мақомоти Русия гуфтанд, ки ин "пешгирӣ аз як ҳамлаи террористӣ дар макони таҷаммӯи нафарони зиёд дар Маскав" буд.

Ин дар ҳолест, ки бо гузашти ду рӯз аз он ҳодиса ҳанӯз мақомоти Тоҷикистон дар бораи ин шахс огоҳонида нашудаанд ва санҷиши дурустии иттилои мақомот ҳамоно ғайриимкон аст.

Бархе коршиносон дар Тоҷикистон ба дурустии иттиҳоми мақомоти рус шубҳа карданд. Дар камтар аз ду ҳафтаи охир ин алакай сеюмин хабари ба терроризм айбдор шудани шаҳрвандони Тоҷикистон дар Русия аст. Рӯзи 18 июл аз боздошти як шаҳрванди 32-солаи Тоҷикистон дар Хабаровск хабар доданд. Бисёриҳо ин фарзияи мақомотро ба зери шубҳа бурда, мегӯянд, видеоҳои нашркардаи ФСБ ба саҳнасозӣ шабоҳат доранд.