Кормандони Вазорати корҳои дохилии шаҳри Душанбе аз пешгирии як фоҷеаи маргбор дар ноҳияи Синои пойтахт хабар медиҳанд.
Бино ба иттилои шуъбаи Вазорати корҳои дохилӣ дар ноҳияи Синои шаҳри Душанбе кормандони ин ниҳод аз нақшаи як муноқишае, ки бояд бо кордзанӣ анҷом мешуд, огоҳ шуда, ноболиғ Назиров А., сокини 16-солаи шаҳри Душанберо боздошт карданд. Маъмурони пулис мегӯянд, ин муноқиша метавонист ба марги як ноболиғи дигар оварда расонад.
Дар натиҷаи кофтуков, аз ноболиғ як корд пайдо ва мусодира шуд. Назиров А. дар рафти пурсиш иқрор кардааст, ки мехост бо ин корд ҳангоми муноқиша ба як наврас зарари ҷисмонӣ расонад.
Гуфта мешавад, таҳқиқи ҳодиса аз ҷониби пулиси шаҳри Душанбе идома дорад.
Соли гузашта, Вазорати корҳои дохилӣ амалиёти вежае таҳти номи “КОРД” баргузор кард, ки дар натиҷа чандин нафар бо гумони фурӯши ғайриқонунии кордҳои хурди киса (финка) боздошт шуданд. Дар рафти амалиёт, зиёда аз 100 дона корди гуногуни бурандаву халанда дарёфт ва мусодира шуд. Нисбати боздоштшудаҳо, тибқи моддаи 492-и Кодекси ҳуқуқвайронии маъмурӣ парванда боз карда шуда, ҷарима таъин гардид.
Ин дар ҳолест, ки солҳои ахир сокинон аз афзоиши истифодаи кордҳои хурд, ки ба гуфтаи онҳо дар байни навҷавонони пойтахт “муд” шудааст, шикоят мекунанд. Дар аксари ҷанҷолҳои кӯчагӣ аз чунин силоҳҳои сард истифода мешавад.
Ба назари мунтақидон, бастани мадрасаҳо, манъи ворид шудан ба масҷид то 18-сола ва боздошти қишри руҳоният сабаб шуда, ки дар ҷомеаи Тоҷикистон ҷавонон аз таълимоти динии ибтидоӣ, ки бештар ахлоқи диниро ба ҷавонон меомӯхтанд, дур монанд ва ба ҷиноятҳои зиёде, монанди қатлу куштор, рӯ овардан ба мухаддирот ва ҷиноятҳои сангин даст бизананд.
